Festiválajođiheaddji:– Jáhkán Ella sáhttá olahit seamma guhkás go Mari Boine

ISÁK-joavku čuojaha dál geassit Riddu Riđđus, Márkomeanus ja Ijahis Ijas.

Riddu Riđđu festiválajođiheaddji Sandra Márjá West rámida ISÁK joavkku.

– Sis lea energiija ja kvalitehta, ja duođaid dovdo ahte sii ráhkistit leat lávddi alde, ja mun navddán ahte ollugat háliidit gullat sin, ja erenomážit dál go leat almmuhan iežaset vuosttaš skearru, dadjá West.

Ovdáneapmi

West muitala ahte sii leat čuvvon ISÁK ja sii leat fuomášan movt joavku lea ovdánan, ja su mielas lea suohtas oaidnit man bures joavku lea lihkastuvvon.

– Lea leamašan somá čuovvut ovdáneami, ja movt sii leat šaddan nu bivnnut Norgga musihkkamáilmmis ja servvodagas, muitala West.

– Sii nagodit nu govdadit deaivat guldaleaddji, ja maiddai go smiehttá makkár dilli lea leamašan sámi kultuvrras ovdal, omd. man čihkosis luohtti lea leamašan. Lea movttiidahtti oaidnit dákkár ođđa nuorra sáme artista geavahit luođi, dadjá West.

Illuda vuolgit Riddu Riđđui

ISÁK fánsa ja Detnolaš Margrethe Ballo (26) lea vuolgimin Riddui gullat joavkku, ja muitala son lea leamašan golbma dahje njealje ISÁK konsearttain ja go son gullá ISÁK, sus šaddá miella dánsut.

– Dáid maŋimuš jagiin lea mu mielas musihkkamáilmmis produserejuvvon olu seammalágan musihkka. Ja dat sáhttá leat manin olbmot liikojit ISÁK, go sis lea veahá earalágan musihkka, oaivvilda Ballo.

– Mun jáhkán olbmot háliidit gullat veahá earálágan musihkka, juoga mii lea veahá eanet geasuheaddji, en go dat dábálaš musihkkat maid dat nu gohčoduvvon hit-mášiinnat ráhkadit, dadjá Ballo.

Vokalista buohtastahtto Mari Boinen

Margrethe Ballo oaivvilda Ella lea okta dán generašuvnna áŋgiruššiin.

– Ella áŋgiruššá sihke sámi rivttiide, musihkas ja son lea maiddái miellahtu Luonddu- ja nuorain. Son lea hui čaffat, son rahčá iežas áššiid ovddas. Son dadjá justa maid oaivvilda. Ella ja Mari Boines leat olu sullasašvuođat, dadjá Ballo.

– Okta dain buoremus konsearttain mas mun lean leamaš lei diibmá, go Mari Boine lei lávddi alde ja de loahpaguvlui lávkii Ella maid lávdái, dat lei oalle rámálmas, muitala Ballo.

Riddu Riđđu festiválajođiheaddji Sandra Márjá West jáhkká Ella sáhttá olahit seamma guhkás go Mari Boine, ja rámida Ella Marie duostilvuođa.

– Son duostá hállat dehálaš áššiid birra. Son lea hui garrasit vuosttildan ruvkedoaimmaid ja son lea maid hállan psyhkalaš váttisvuođaid birra, dadjá West.

– Sus lea juoga eará maid muitala musihkka bokte. Ja mun jáhkán dan láhkai sii nagodit olahit olbmuid, dadjá West.