Buot násttit bohtet vaikko leage girdibargoheaitta

– Dál lea min stuorámus hástalus ahte fidnet buot artisttaid Olmmáivággái áiggil.

Dan muitala Riddu Riđu jođiheaddji Sandra Márjá West.

SAS-bargoheaitta lea dagahan sidjiide liigehástalusaid vuollil vahku ovdal festivála rahppu.

Dán jagi Riddu Riđđu lágiduvvo Olmmáivákkis Gáivuonas suoidnemánus 13. beaivvis 17. beaivái.

Dán jagi stuorámus namat leat Angelique Kidjo, The Halluci Nation, Lido Pimienta. Isák, Niilas, Katarina Barruk, Ailu Valle + Amoc + Trio Boogiemen ja Elin & The Woods.

Liigeruhtagollu

Streaikka geažil lea Riddu Riđđu ferten máŋgga artistii ođđa girdibileahtaid diŋgot, ja dát šaddá divrrasin, muitala West.

– Dán rádjai mii leat sihkkarastán ahte buohkat besset deikke áiggil. Hástalussan leat bileahttahattit. Dál leat golmma geardde divraset go ovdal streaikka.

Stuorra bargu beassat Riddui

Muhtimiidda lea Riddu Riđđu dehálaš oassi geasis.

Kátjá Rávdná Broch Einebakken lea okta dain, geaidda festivála lea šaddan árbevierrun.

– Mun leamaš Riddu Riđus das rájes go riegádin. Dábálaččat de lea festivála seammá áigodagas go mu riegádanbeaivi.

Kátjá orru dál Oslos, ja lei sihkkarastán girdibileahtaid SAS mielde áigá.

Muhto de šluhttii SAS su girdi.

– In mun heađástuvvan. Mun jurddašan, ahte gal olmmoš beassá davás muhtin láhkai, muhto eatnis lei hui miella ahte galgen boahtit.

Doarju bargoheaitaga vaikko sutnje čuohcá

Kátjá beassá festiválii, go eadnis Siri gávnnai ja diŋgostii bileahtaid Torppas Evenáššái.

– Beasan mun gal. Muhto festivála gal lágiduvvo vaikko mun in boađášege bargin dokko.

Kátjá oaivvilda ahte vaikko leat váikkuhusat streaikka geažil, de lea dát dehálaš ášši SAS-pilohtaide.

– Vaikko munnje gárttai liigemátki, de lea dan veardde dehálaš ahte sii besset streiket, ja mun doarjjun sin ášši.

Hárjánan hástaleaddji dillái

Vaikko vuorddekeahtes hástalusat ihtet dađistaga, de eai Riddu Riđu bargit heađástuva.

Sii leat ovdal vásihan hástalusaid ja dihtet mo galget čađahit festivála earenoamáš dilis.

Earret eará lei 2021 festivála pandemiija-áigge.

Buohkat, geat áigo fitnat, fertejedje beaivválaččat johtilis iskosa váldit. Maŋimuš beaivve festiválas, de ihte hástalusat dás.

Diimmá Riddu Riđđu: Korona-njoammun hehttii lágideami

Šaddá festivála beroškeahttá streaikkas

Festiválajođiheaddji Sandra Márjá ii loga festivála vaikkuhuvvot nu go dál lea dilli.

– Mii fertet plánet rievdadusaid ja dilálašvuođa mielde, ja mun jáhkán ahte vaikko mii dal de dáhpáhuvaš, de šaddá somás festivála dán jagi.