Marianne Neerland Soleim lea okta «Grenselos i grenseland»-nammasaš girjji čálliin.
Son galleda dán jagáš Márkomeannu-festivála, muitalan dihtii girjji sisdoalus.
– Girjjis muitaluvvo rádjeofelaččaid dramáhtalaš muitalus okkupašuvdnajagiin Davvi-Nordlánddas ja Mátta-Romssas. Máŋga rádjeofelačča ledje sápmelaččat.
«Sápmelaš rádjeofelaččat eai meannuduvvon beare bures jagiid maŋŋá soađi, sii sivahallo eahperievttálaččat, eaige ožžon dohkkeheami barggu ovddas».
Nie cealká girječálli Soleim preassadieđáhusas.
(Artihkal joatkašuvvá vuolábeale gova)
MÁRKOMEANNU: Vuorkágovva.
Foto: Kenneth HættaFuomášuhttá soahtehistorjjá
Dán jagi leat guokte lágideami Márkomeanus, mat leat Davvi-Nordlándda ja Mátta-Romssa soahtehistorjjá birra.
Okta festivála lágidemiin, lea seminára man namma lea «Eallin mánnán márkkogilážiin soađiáiggi 1940–1945».
Dása bovdejuvvojit olbmot ságastallat singuin ledje mánát soađeáigge.
– Maid muitet sii, ja mo sii vásihedje soađi – sihke buriid ja baháid.
Lea Várdobáikki museajođiheaddji, Marit Myrvoll, guhte jođiha seminára.
Festiválas lea maid sierra girjjálašvuođaprográmma, mii gohčoduvvo «Rádjeofelaš rájá alde», Márkomeanu girjerádjosis, mii earret eará guoská girjái «Grenselos i grenseland».
