Finnmárkui leat maŋemus jagiid boahtán eanet olggobeal bivdit dan dihte go rievssatnálli lea hedjonan máŋgga sajis Norggas, seammás go Finnmárkkus ain lea buorre nálli. Finnmárkulaččain galgá leat ovdamunni das go orrot fylkkas ja dan dihte divrudit smávvafuođđobivddu olggobeal fylkka ássiide.
Vurdet eanet bivdiid
– Sihke giron- ja rievssatnálli leat buori dásis Finnmárkkus ja mii vuordit ahte bohtet eambbo bivdit. Dalle lea lunddolaš ahte mii loktet hattiid veahá čájehan dihte ahte finnmárkulaččain dat leat vuoigatvuođat. Jáhkán ahte boahtteáigi čájeha ahte earru finnmárkulaččain ja sis geat ásset olggobealde stuorru, lohká FeFo direktevra Jan Olli.
FeFo lokte suoidnemánu 1. beaivvi rájes olggobeal fylkka ássiide smávvafuođđobivddu hatti 50 ruvnnuin beaivegoarttas, nu ahte šaddet máksit 250 ruvnno beaivvis, ja 260 ruvnnuin áigodatgoarttas, nu ahte šaddet máksit 1200 ruvnno áigodagas. FeFo ii lihkahala dan hatti maid finnmárkulaččat mákset smávvafuođđobivddus.
– Finnmárkulaččat šaddet maid máksit dan ovddas go bivdet, muhto dat haddi lea olu vuolábeal dan maid olggobeal fylkka ássit šaddet máksit. Finnmárkulaččat mákset 300 ruvnno go bivdet birra jagi dan gielddas gos ásset, ja váile 900 ruvnno olles fylkkas birra jagi.
– Vuordibehtet go oažžut olu lassi dietnasa dán dihte?
– Mii eat dieđus dieđe man olu dinet, go eat dieđe man olu olbmot bohtet ja movt rievssatnálli lea. Ii leat datge ulbmil, m
uhto lea lunddolaš ahte olggobeal olbmot mákset eambbo. Galgá leat erohus finnmárkulaččain ja earáin min luondduresurssaid geavaheamis.
Hálbbidit nuorra bivdiide
Seammás go FeFo divruda smávvafuođđobivddu olggobeal ássiide, de luoitá hatti nuorra bivdiide, sihke sidjiide geat ásset Finnmárkkus ja olggobeal Finnmárkku. Nuorra bivdit ožžot 80 proseantta vuoládusa hattis, ja mihttu lea lasihit bivdiid.
Bivdit geat čađahit bivdigeahččaleami Finnmárkkus 2016:s besset ges bivdit nuvttá ruovttugielddas. Dát lea oassin FeFo logi jagi ávvudeami fuomášahttimis ja FeFos lea maid sávaldat sihkarastit dábálaš bivddu boahtteáiggis.
