NRK Meny
Normal

SGP skearru boađi boađi

Sámi Grand Prix skearru lea maŋimuš guhtta jagi leamaš okta sihkkareammos geassemearkkain. Juolot liikot dasa dahje it, muhto dat ilbmá dán jagi maid.

Sámi Grand Prix 2007 CD-olggoš
Foto: Bernt Mikkel Haglund, Rieban

Sámi Grand Prix skearru buvttadeaddji, Bernt Mikkel Haglund, lohká iežas duhtavažžan dán jagi buktagiin, mii lea dat čihččet SGP-skearru.

- Dat lea šaddan buorre. Dat mii dán jagi lea erenoamáš lea ahte dán jagi ledje mielde guokte čuojahanjoavkku gilvvuin, Guohparat ja Áigi. Dábálaččat han lávejit eanaš dušše ovttaskasártisttat mielde, čilge Haglund.

Visot mielde

Ola Stinnerbom vuoitolávlla "Snowflow" lea diehttelasat mielde skearrus. Nu maiddái Nils Rune Utsi ja Marit Susanne Utsi lávlla "Osku", mii bođii nubbin. Seammá lea Áiggi lávlla "Luoitte luovos", mii dán jagi gilvvuin faskii goalmmátsaji. Oktiibuot leat čieža lávlaga mielde skearrus.

Sámi Grand Prix skearrus leat mielde oktanuppelohkái luođi. Dáid gaskkas leat Ánne Biret Peltoperä luohti "Helene", Somon Issát Marainena "Luonddu luohti" ja Wenche Nordsletta luohti "Ina". Dát bohte vuosttasin, nubbin ja goalmmádin juoigangilvvus.

Čájeha gávtti

CD-olggožis oaidná juoga man lea álki dovdat, namalassii oasi Guovdageain`gávttis. Olggošgova lea Katja Dreyashina ovttasráđiid Bernt Mikkel Haglundain hábmen.

- In dieđe maid dát olggošgovva galggašii muitalit. Dat čájeha njulgestaga oasi gávttis, čilge Haglund Ártna neahttasiidui.