NRK Meny
Normal

Fállet ruđaid bohccobáhčima dieđuin

Ivgoláhku boazoeaiggádat Romssámttas fállet dál 30.000 ruvnno dasa gii sáhttá buktit dieđuid gii dahje geat orohaga bohccuid leat báhčán Romssa fylkkas.

Báhččon bohccot

Ivgolágu boazoeaiggádat leat máŋggaid jagiid gávdnan jámasbáhččon bohccuid. Dál sii fállet ruđa dasa geas leat dieđut bohccuid báhčaleami birra.

Foto: Isak Thomas Gaup

Dán duođašta Ivgoláhku boazoeaiggát, Henrik H. Gaup, ja lohka supmi stuorisin, muhto dat lea áidna vuohki movt sii doaivumus ožžot dieđuid geat vearredahkkit leat.

Gaup lohká báhčaleami ášši mii ii leat jur odne dahje ikte čuožžilan, ja dadjá ahte sii máŋga jagi leat vásihan bohccuid báhčaluvvon.

– Mii leat gávdnan bohccuid mat leat báhččon jámas, ja mii leat maiddái gávdnan bohccuid main čoalit heaŋgájit oidnosis.

Skuddsakder på rein

Bohccuid báhčin ii oro ávkin váidit, go bahádahkkit eai gávdno. Dál boazoeaiggádat geahččalit ruđain oaččuhit dieđuid bahádahkkiid birra.

Foto: Isak Thomas gaup

Eai áššáskuhttán

Henrik H. Gaup muitala dáhpáhusa birra mas politiiját dutke olbmo gii gávdnui báhcán ja njuovvan bohcco. Su čilgehus lei ahte boazu lei nu bahuid roasmmahuvvan ahte son fertii dan goddit.

Go politiijat jerre manin son lei fievrridan dan bohcco daoresbeallái, de sus dasa ii lean vástádus. Dattege dát dievdu ii áššáskuhttojuvvon.

Henrik Gaup muitala ahte sii dávjá gávdnet njuovvansajiid, jámas báhččon bohccuid ja gávdnet maiddái belohahkii jámas báhččon bohccuid.