– Go leat lágideaddjin dáid doaluin, de beassat maid mearredit mo čiekčamiid čađahat, lohká Sámi spábbačiekčanlihttu várrepresideantta Håkan Kuorak.
Čájehit sámi
Spábbačiekčanlihttu N.F.-Board joavkkut dat servet čiekčamiidda, ja golbma nissonjoavkku ja guhtta almmáiolbmojoavkku leat dássážii dieđihuvvon čiekčamiidda. Suoidnemánu čihččet beaivve álget čiekčamat ja loahpahuvvojit 13. beaivve.
Håkan Kuorak lohká SR Sámi Radioi ahte hálidit čájehit joavkkuide mat bohtet, oasi sámis.
– Vuosttaš čiekčan galgá mannat gaskaija beaivvážis, ja heargeráidu galgá stadionai boahttit, earret eará buktet spábba mainna vuosttaš čiekčan galgá čađahuvvot, rápmusta Kuorak.
Kultuvra guovddážis
Sámi spábbačiekčanjoavku vuitti dan vuosttaš Viva World Cupa 2006:s, doalut mat ledje Occitanias Fránskas. Dál lea Sámi spábbačiekčanlihttu lágideaddjin dán gease doaluin, plánemin erenoamáš doaluid gussiide geat bohttet Sápmái.
– Ráhpandoalus galget joavkkut vázzit spábbačiekčanšiljjui leavggaiguin, dan maŋŋá šaddá dánsa ja mis galget sámi artisttat guoimmuhit, sihke lávlut ja juoigit, čilgesta Håkan Kuorak.