NRK Meny
Normal

Gearggus searvat sámegiela hálddašanguvlui

Oarje-Finnmárkku Fálesnuori suohkan lea gearggus searvat sámegiela hálddašanguvlui. Nu dadjá Fálesnuori suohkana sátnejođiheaddji, ja lohka suohkana gárvvisteamen sámegiela doaibmaplána. vuordimis ášši meannuduvvo suohkanstivrras čavčča beallái, dadjá sátnejođiheaddji.

Terje Wikstrøm, ordfører i Kvalsund kommune

Fálesnuorri lea eahpitkeahttá mearrasámi suohkan, dadjá Fálesnuori suohkana sátnejođiheaddji, Terje Wikstrøm.

Foto: Kvalsund kommune

Lei Nussira ruvkedoaimma ásaheami oktavuođas ahte Fálesnuori suohkana sátnejođiheaddji, Terje Wikstrøm, ákkastalai ahte Fálesnuorri eahpitkeahttá lea mearrasámi suohkan, ja mearkkaša ahte maiddái mearrasápmelaččat leat danin mielde doarjumin ruvkedoaimma Fálesnuoris.

Sámegiela doaibmaplána

Maŋŋil go Fálesnuori suohkanstivra 2014 maŋidii ášši, de hálddahus biddjui gárvvistit Fálesnuori suohkanii sámegiela doaibmaplána. Plánain lea Fálesnuori suohkan ain bargamin, ja vuordimis ášši ovddiduvvo suohkanstivrii čavčča beallái, dadjá sátnejođiheaddji, Terje Wikstrøm.

Fálesnuoris ledje diibmá skuvlaoahppit geain lei sámegieloahpahus, ja dan sii fertgejedje čoavdit olggobealde vehkiin, dadjá Wikstrøm. Son muitala ahte sámegieloahpahus lei dat mii dagáhii ahte sii árvvoštallegohte searvat sámegielaid hálddašanguvlui.

Manin guorahallat?

Manin suohkana bealis čađahit viiddis guorahallama sámegiela hálddašanguvlui, iige dušše mearridit ahte suohkan ohccá dohkkehuvvui sámegiela hálddašanguvlui ?

Dása vástida sátnejođiheaddji, Terje Wikstrøm, ahte buot áššiid lea dárbu dárkilit guorahallat ovdalgo daid mearridit, ja dasa lassiin ii leat dušše giellaoahpahus mii lea vuođđun jus ohcet dohkkehuvvot sámegielaid hálddašanguvlui, dadjá Wikstrøm.

Tšerje Wikstrøm maiddái lohka imaštit manin mediaid bakte dál galget cuiggodit Fálesnuori suohkana go sii deattuhit ja fuomáštuhttet sámivuođa Fálesnuoris.

Guldal jearahallama Fálesnuori sátnejođiheddhiin:

Fqlesnuorri - mearrasqmi suohkan