NRK Meny
Normal

Evttohuvvon Gullruten bálkkašupmái

Filbma «Árktalaš supernásti - Arctic Superstar» lea evttohas Gullruten bálkkašupmái tv-dokumentára suorggis.

Slincraze iežas rukses biillan

GILVALA DOKUMENTÁRA SUORGGIS: «Árktalaš supernásti - Arctic Superstar» filmmas govviduvvo nuorra mázelačča artistaeallin. Miessemánus sáhttá filbma oažžut Gullruten bálkkašumi.

Foto: Martin Rustad Johansen

«Árktalaš supernásti - Arctic Superstar» dokumentára lea mázelačča ja sámi ráppára Nils Rune Utsi, SlinCraze birra. Filbma čájeha Utsi barggu musihkain ja filbmadahkki lea Simen Braathen.

Filbma gilvala golmmain eará dokumentárain: «Fra barn til borger«, «Dugma – the button» ja «Pengepredikanten», mii lea NRK Brennpunkt dokumentára.

Buvttadeaddji Simen Braathen ja Slincraze

NJEALLJE JAGI FILBMEN: Filmma buvttadeaddji Simen Braathen lea njeallje jagi čuvvon sámi ráppára Nils Rune Utsi - SlinCraze.

Foto: Martin Rustad Johansen

VG almmuhii ikte dán jagáš evttohasaid Gullruten bálkkašupmái. Gullruten lea televišuvnnasuorggi gutnebálkkašupmi, ja dan leat ásahan Norgga filbma- ja Tv buvttadeaddjiid lihttu.

2016 čájehuvvui «Árktalaš supernásti» Romssa filbmafestiválas, ja lea maid čájehuvvon Norgga NRK1 kanálas golggotmánus diibmá. Filbma lea maid vuoitán bálkkašumi «Northern Character» nammasaš filbma- ja TV-festiválas Murmánskkas Ruoššas.

Mázelaš lea šaddan beakkán go rap-musihka bokte lea govven movt son vásihii givssideami nuorran. Son lea rahpasit hállan dáid hástalusaid birra, ja lohká leat vánhemiid ovddasvástádus oahpahit mánáide ahte givssideapmi lea dohkketmeahttun.

Gullruten bálkkašumiid juhket miessemánu 12.beaivvi, Bergen gávpogis.