Les på norsk:

Gádde-Iččát, Muosáhis lea evttohuvvon báikin gosa sirdit Hámmerfeastta gávpotbohccuid. Dát bođii ovdan čoahkkimis váttisvuođaid birra maid olbmot vásihit go leat ollu bohccot gávpogis.

Dan čállá iFinnmark.

Boazodoalloorohagas 20 gulahallanolmmoš, Aslak Ante Sara, muitala ahte sii leat bargame guovtti evttohusain. Dan muitala maŋŋel gaskavahku čoahkkima Hámmerfeastta sátnejođiheddjiin ja stáhtahálddašeaddjin.

– Vuosttaš lea evalueret gávpoga áiddi mii álgošiehtadusa mielde lea nohkan. Nubbi lea gávdnat čovdosiid boazodoalu ja servodaga muđui áitojuvvon areáladiliide. Dan oktavuođas lea dahkkon Rambøll/Protect Sápmi guorahallan mii čujuha Gádde-Iččát vejolaš čoavddusin dahje buhtadusguovlun. Viidát čuovvoluvvojit čielggadusa ávžžuhusat ovttas máŋggaiguin eará eiseváldeorgánaiguin.

Muosát sátnejođiheaddji Ingrid Majala mielas ii leat heivvolaš sirdit bohccuid Gádde-Iččáide.

- Mis lea leamaš vuosttaš čoahkkin Eanandoallodirektoráhtain čielggadeami birra, muhto mis lea maid Muosát suohkanis bistevaš mearrádus ahte eai galgga leat bohccot Gádde-Iččáin. Mearrádus gusto gitta ođđa mearrádus lea dahkkojuvvon. Nu ahte ii leat áigeguovdil bidjat bohccuid dohko, dadjá son.

Dat mearrádus bođii 80 logus.

- Nu mo mun lean ipmirdan, de ii leat Gádde-Iččát oassi boazodoalloguovllus. Doppe galgá leat čujuhus luonddu várás, geahččat mo luondu rievtti mielde šaddá, go buohtastahttá dan eatnamiin gos bohccot guhtot, dadjá Ingrid Majala.