NRK Meny
Normal

Evttohit sámi vealahanáittardeaddji Sámediggái

– Kárášjoga Sámeálbmotbellodat evttoha ásahit sierra sámi vealahanáittardeaddji Sámedikkis, vai Sámediggepresideanta ii álot dárbbaš jur buopt áššiide vástidit. Eará Sámediggejoavkkut dorjot jurdaga.

Forsker Asta Mitkijá Balto på Samisk høgskole

Sámeálbmotbellodaga miellahttu, Asta Balto, dat árvala sierra sámi vealahanáittardeaddji Sámedikkis.

Foto: Liv Inger Somby

Lea Kárášjoga Sámeálbmotbellodaga miellahttu, Asta Balto, guhte bellodaga jahkečoahkkimis árvalii ásahit sierra sámi vealahanáittardeaddji Sámedikkis.

– Cielaheamit ja vealaheamit maid sámi nuorat duollet dalle ain vásihit, ja dat movt min sámi gávtti bilkidit duođašta ahte dál livččii dárbun ja áigi ásaheames sierra vealahanáittardeaddji Sámedikkis.

Nu dadjá Kárášjoga Sámeálbmotbellodaga miellahttu, Asta Balto, ja ákkastallá ahte sáhtášii bidjat dán suorgái sierra áššemeannudeaddji geas livččii ovddasvástádus diekkár áššiid fuolahit.

  • Guldal Asta Balto ákkastallama dás:

Ii leat Sámedikki cuiggodeamen

– Vaikko son evttoha dákkár virggi, de dat ii mearkkaš ahte Sámediggi ii bargga doarvái buori barggu, muhto sámediggi dárbbaša veahki ja neavvagiid iežas álbmogis, dadjá Asta Balto.

Dás ii galgga leat nu ahte lea dušše Sámediggepresideanta duohken vástidit go dákkár áššit čuožžilit, go Sámedikkis han dárbbašuvvojit maiddái áššedovdit, loahpaha Asta Balto.

Bargiidbellodat doarju jurdaga

Sámedikki bargiidbellodaga joavkojođiheaddji, Vibeke Larsen lohka doarjut Asta Balto jurdaga, ja čujuha cielahemiide sámit vuostá ja geassá earenoamážiid ovdan neahttacielaheami mii dál lea hui guovddážis. Larsen dadjá ahte sii šaddet geahčadit árvalusa go dat ovddiduvvo ovdalgo loahpalaččat dorjot dahje hilgot árvalusa

Fertet gal iežaset daguid guorahallat

Sámit Lulli Norgga listtu áirras, Marie Therese Nordsletta Aslaksen, lohka váttis ollásit doarjut Sámeálbmotbellodaga evttohusa, go ii dovdda dan sisdoalu, muhto jurdda gal lea buorre, dadjá Aslaksen. Maiddái olgešbellodaga áirras, Ellen Kristine Saba lohka doarjut vealahanáittardeaddji jurdaga. Ovddádusbellodaga joavkojođiheaddji, Aud Martinen, maiddái lohka doarjut jurdaga, muhto lasiha ahte mii fertet iežamet dásis álgit, ja jurddašit maid ja movt mii ieža dadjat ja lahttet earáid ektui.