Hopp til innhold

Evttohit láhkarievdadusa mii eastadivčče lasi Fovse-áššiid

Stuorradiggi berre dáhttut ráđđehusa rievdadit dálá ortnega mii addá fitnodagaide lobi huksegoahtit boazodoalloeatnamiin ovdalgo ášši lea riekteásahusain loahpalaččat čielggaduvvon.

Nu evttoha Rukses bellodat. Ruonábellodat (MDG) ja Sosialisttalaš gurutbellodat dorjot evttohusa.

Dien lea Norgga olmmošvuoigatvuođa ásahus, NIM, ge evttohan. (nhri.no)

– Fovse ášši, mas Alimusriekti cuiggoda olmmošvuoigatvuođarihkkuma, lea ovdamearkan dasa man funet geavvá go eiseválddit addet huksenlobi ovdalgo ášši lea ollásit čielggaduvvon lágalaččat.

Nu lohká Ruksesbellodaga njunuš, Bjørnar Moxnes.

Moxnes mielas lea šállošahtti go Stuorradikki eanetlohku ii doarjjo evttohusa.

– Fovse-áššis oaidnit man váttis lea oažžut eiseválddiid ja fitnodagaid gaikut bieggaturbiinnaid go dat vuos leat huksejuvvon, go nu olu ruđaid leat golahan huksemii, lohká son.

Olles stuorradiggi digaštallá evttohusa bearjadaga go meannudit rievdadusaid plána- ja huksenlágas áššiin mat gusket bieggafápmu huksemiidda Norgga nannámis. Les på norsk.

Bjørnar Moxnes (R)
Foto: Mette Ballovara / NRK

Korte nyheter

  • Muohta dieđihuvvon davvin

    Meteorologalaš instituhtta lea sádden muohtavárrehusa osiin davit Nordlánddas, Romssas ja Finnmárkkus. Gaskavahku rájes leat šlahtti ja borga vuordagis. Vurdet ahte muohta boahtá su. 100-300 mehter badjel meara, muhto sáhttá maid boahtit duolbaset guovlluide, čállet meteorologat Xas/ Twitteris.

  • Olgešbellodagas lea eambbo sátnejođiheaddjit go Guovddášbellodagas

    Dál leat Olgešbellodagas eambbo sátnejođiheaddjit go Guovddášbellodagas. Seammás lea ain máŋgga gielddas eahpečielggas guđe bellodat oažžu sátnejođiheaddji maŋŋel válggaid. Dássažii lea Olgešbellodat sihkkarastán 90 sátnejođiheddjiid, čállá Nationen.

    Ovdal válggaid ledje bellodagas dušše 35 sátnejođiheaddji. Ovdal válggaid ledje 135 sátnejođiheaddji Norggas geat gulle Guovddášbellodahkii, dál leat dušše 81 sátnejođiheaddji. Dát mearkkaša ahte Olgešbellodat lea dat bellodat mas leat nubbin eanemus sátnejođiheaddjit. Njunnošis lea ain Bargiidbellodat 106 sátnejođiheddjiin.

    Norgga 357 suohkanis leat vel 35 suohkana gos ii leat čielgan gii šaddá sátnejođiheaddji.

    (NTB)