Evttohit 460 miljovnna ođđa vistái
Suodjalusministtar ja olgešbellodatpolitihkar Frank Bakke-Jensen suođai bušeahttaođđasa 2022 bušeahtas, go finai guossis Guovdageainno suohkanis gaskavahkko. Ráđđehus evttoha 460 miljovnna ođđa vistái, maid Sámi joatkka- ja boazodoalloskuvla ja Sámi Našunálateáhter Beaivváš juogadeaba. – Visti máksá 460 miljovnna ruvnno hukset, ja mii juolludit 60 miljovnna álgo ruhtadeapmin, nu ahte dál ii leat go álgit hukset, dadjá Frank Bakke Jensen. Stuorradiggi dat loahpalaččat dohkkeha stáhtabušeahttaevttohusa, muhto olgešbellodagas lohket dál juo oalle sihkkar das ahte dása ožžot eanetlogu stuorradikkis.
NRK Sápmi čálii álggos ahte árvalus lei 560 miljovnna ruvnnu ođđa vistái. Rievttes lohku lea 460 miljovnna.
