Maŋŋil go Árbordde (Hattfjelldal) suohkanstivrra eanetlohku jagi 2015 geassemánus mearridii ohcat suohkana laktojuvvot sámegiela hálddašanguvlui, de suohkan sáddii ohcamušastis Gieldda- ja ođasmahttindepartementii 2015 golggotmánus.
Dál evttoha departemeanta viiddidit hálddašanguovllu, ja lea sádden ášši gulaskuddamii. Árbordde suohkanstivra galgá mearridit ášši juovlamánus.
Sámediggi dohkkehan
Sámediggi maiddái meannudii Árbordde suohkana ohcamuša, ja dohkkehedje 2016 guovvamánu 16.beaivvi ahte Árbordde suohkan dohkkehuvvo sámegiela hálddašanguvlui.
Sámegiela hálddašanguvlui dál gullet: Kárášjohka, Guovdageaidnu, Unjárga, Porsáŋgu, Deatnu, Gáivuotna, Loabát, Divttasvuotna, Snoasa ja Raarvihke. Jus Árborde nai dohkkehuvvo, de leat 11 suohkana dohkkehuvvon sámegiela hálddašanguvlui.
Gielalaš vuoigatvuođat
Go suohkan dohkkehuvvo sámegiela hálddašanguvlui, de dat vuolggaha gielalaš vuoigatvuođaid dan suohkana álbmogii go sii deaivvadit iešguđetge almmolaš ásahusaiguin.
– Jus suohkanstivrra eanetlohku juovlamánus gulaskuddancealkámuša meannudeamis dohkkehit laktojumi sámegieala hálddašanguvlui, de dat dagáha vejolažžan ealáskahttit sámegiela.
Dan daddjá Árbordde sátnejođiheaddji, Harald Lie, iige loga dál sáhttit dadjat maid suohkanstivrra eanetlohkku mearrida.
Gulaskuddanáigi
Gielda- ja ođasmahttidepartemeanta bivdá gulaskuddanásahusaid ovddidit gulaskuddancealkámušaidis Gielda- ja ođasmahttindepartementii ovdal boahttejagi ođđajagimánu 3.beaivvi
