Dan árvala Norgga Sámiid Riikasearvvi (NSRa) sámediggeáirras Ann-Mari Thomassen.
– Diekkár ortnegiin soaittášii leat vejolaš seailluhit eanet giliskuvllaid Sámis, navdá son.
– Stáhta ja Sámediggi ruhtadeaddjin
Stuorámus ruhtadeaddji berrešii leat stáhta ja Sámediggi ja gielddat maid sáhtášedje máksit oasi priváhtaskuvllaid ásaheames, evttoha Thomassen.
Evttohusa ovddida son ihttin ođđa áššin Sámedikki dievasčoahkkimis Kárášjogas. Ná son dahká go olu smávit skuvllat Sámis leat heaittihuvvon maŋimuš jagiid áigge ja dál su ruovttugielddas
Skániin Mátta-Romssas áiggošii gielda heajos ruhtadili geazil heaittihit Vatnjavári skuvlla (darogillii Boltås skole). Skuvla lea leamaš guovddážis ealáskahttimen sámegielgeavaheame Skániin ja eanetlohku oahppiin leat sámemánát.
Lagabuid duhát olbmo Skániin leat vuostálastan skuvlaheaittiheami nammačoagginákšuvnnain. Sámediggi ge vuostálastá heaittiheami ja árvvoštallá Ovttastuvvan Nášuvnnaide (ON:ii) diedihit ášši go oaivvildit Norgga stáhta ná rihkkut eamiálbmotvuoigatvuodaid.
ON almmatge soaitá ádjánit máŋga jagi geahčadit Sámedikki cuiggodeami ja Thomassen lohká leat hoahppu gávdnat čovdosa mii gájušii Vatnjavári ja eará giliskuvllaid Sámis.
– Sámis leat jo olu priváhta mánáidgárddit ja dál dáidet priváhta skuvllat ge darbbašuvvot, lohká son.
