NRK Meny
Normal

Evenášši gilážat hálidit Skániide

Olbmot dáhtot rievdadit filkka- ja gielddarájá mii mánná čađa sámi gilážiid Skániin ja Evenáššis.

Skånland

Evenášši gilážat hálidit gullat Skániide.

Foto: Mathis Eira / NRK

Golbma olbmo leat álggahan joavkku mii dáhttu ahte Evenášši gilážat mat leat Skániid rájá guoras, galggašedje ovttasdahttot Skániid suohkanin, jus Evenášši suohkan mearrida ovttasdahttit Áhkánjárgga dahje Nárviika suohkanin.

Kjersti Myrnes Balto

Kjersti Myrnes Balto dáhttu rievdadit filkka- ja gielddarája.

Foto: Mathis Eira / NRK

Lunddolaš rievdadit rájá

–Sidjiide lea hui lunddolaš rievdadit dán rájá, go sis lea ollu ovttasbargu Skániid beale olbmuiguin. Fuolkevuohta ja sámevuohta maid čatná sin hui garrasit oktii, muitala Kjersti Myrnes Balto. Son lea okta dan joavkkus mii dáhttu rievdadit Romssa ja Nordlándda filkkarájá ja gielddarájá Evenášši ja Skániid gaskka.

Sidjiide maid šaddá guhkes gaska gielddaguovddážii Áhkánjárgii, jus Evenášši suohkan ovttasdahtto Áhkánjárgga suohkanin, lohká Myrnes Balto.

Sii leat sádden ohcama Nordlándda filkkamánnii. Sii vurdet ahte filkkamánne dáhttu Evenášši suohkana álggahit guorahallat ahte gálget go rievdadit gieldda ja filkkarájá, dadjá Kjersti Myrnes Balto

Svein Erik Kristansen (H)

Evenášši sátnejođiheaddji Svein Erik Kristiansen.

Foto: Mathis Eira / NRK

Filkkamánne mearrida

Evenášši sátnejođiheaddji Svein Erik Kristiansen ii loga oaidnán ohcama. Su mielas dát árvalus lei berret boahtit árat, go de ledje sáhtit ráhkanit dása ja máiddái bidjat sierra gažaldaga dán ektui álbmotjienasteames miessemánus. Kristiansen lohká dál leat Nordlándda filkkamánne duohken mearridit maid dahket dáinná árvalusain.

–Son ii sáhte kommenteret juste dán ášši go ii leat ožžon ohcamuša, lohká Robert Isaksen, Norlándda filkkamánne gieldda ja gearggusvuođaossodaga seniorráđđeaddi.

Isaksen lohká jus dákkár árvalusat bohtet maŋŋit sidjiide de sáhttá geavvat nu ahte dát fertejit gieđahallot maŋŋil dábálaš vuogi mielde, iige gielddaođastuhttima oktavuođas.