NRK Meny
Normal

Evangelista geasuhii ollugiid buoridančoahkkimiid

Evangelista devddii servodatviesu Vuonnabađas, ollugat bohte su gullat ja bivdit su bokte buorideami Ipmilis.

Evangelista Svein Magne Pedersen

Evangelista Svein Magne Pedersen sárdnideamen Vuonnabađa servodatviesus

Foto: Anne Olli

Káre Márjá Eira Buljo

Káre Márjá Eira Buljo bođii Guovdageainnus gullat Svein Magne Pedresena

Foto: Anne Olli

Evangelista Svein Magne Pedersen geasuhii ollugiid Vuonnabađa servodatvissuid gullat su sárdnideamen ja oaidnit su rohkadallamin ja buorideamen olbmuid Ipmila namas. Káre Márjá Eira Buljo muitala iežaska isidaš dollen Vuonnabahtii gullat evangelistta Svein Magne Pedersena. Eira Buljo lohká olbmuid dárbbašit gullat eará go dušše cuiggodeami. Olbmot dat gal dihtet ahte ii oktage leat bassi, juohke áidna olmmoš diehta dan. Olbmot dárbbašit illuságaid, gullat árpmus ja almmi ilus.

Evangelista boahtastahttá Ipmilsáni dábálašeallimin

Svein Magne Pedersen sárnidanvuohki ii leat gal nie mo norgga girkuin lea. Ii son čuoččo sárdnestuolus, muhto váccaša ovddabealde, finada muhtin olbmuid luhte, dollesta gean nu oalgái, ja dajalastá ain duos dás somás sániid vai olbmot morihit, vai olbmot besset reaškkihit.

Earret eará geavahii iežas go hálai jorgalusas. Logai ahte go son náitalii, de ii addán son dušše iežas gurotbeali eamidii, son attii iežas ollásit sutnje. Danne go olmmos dahká jorgalusa ja dorvvasta Ipmilii, de ii ábut dušše veahá oskkut, muhto ollásit.

Mildrid Johnsen

Mildrid Johnsen bođii buoridansárdnái gullat Ipmilsáni ja vel danne jos beasašii deaivat Pedersena buoridanrohkosii.

Foto: Anne Olli

Dán sárdnidanvuogi lohká Mildrid Johnsenge liikot. Son mielas lea movttiidahtti gullat gullat Ipmilsáni go das iluin muitalit. Vaikke dal leašge Ipmilsátni, mas sárdnida, de ii dárbbaš dan morrašis sárdnut. De son gal liiko dán sárdnidanvuohkái, danne son álo vuolgá su gullat.

Sárdnida iluin ja movttain

Svein Magne Pedersen sárdnidanvuohki lea oalle erenoamáš, son muitalii olu fierániin, earret eará muitalii Leavnnja albmás gii lei leamaš su buoridančoahkkimis. Almmái lei soppiid geavahan ollu jagiid, muhto dál lei buorránan váttuin maŋŋil go lei fitnan Pedersena luhtte, ja almmai lei de mannan dearvvasvuođaguovddážiid doalvut soppiid. Lei muitalan ahte ii šat dárbbašan dáid, doppe lei buohccedivššár jearran leago son hovrriidišgoahtán. Almmái lei lohkán ii son leat hovrriidišgoahtán, muhto lea geavvan oavdudahku.

Diekkáráš ságaid muitala evangelista Svein Magne Pedersen gaskohagaid, vai olbmot beasse reaškkihit.

Juovlavuona Mišuvnna Searvegoddi ja Vuonnabađa Searvegottedálusearvi dat ledje lágideaddjit. Olaug Maja Seljenes ja Ann-Elise Kero leigga dás njunnožis.