Ráhkis nuorat bohtet busses olggos. Vácci deaivvadit sii Guovdageainnu nuoraid lávlumin joatkkaskuvlla olggobealde.
Sámenuorat sávvet olgoriikkanuoraide bures boahtima ovdalgo vulge sisa skuvlii. Áigumuš otná beaivái lea čájehit olgoriikalaččaide sámi nuoraid árgabeaivvi ja sámi kultuvrra.
Ožžo EU-ruđaid
– Mii oaččuimet veahá ruđa Rasmusis, mii lea hui stuorra organisašuvdna mii sáhttá sáddet ohppiid miehtá Eurohpá ja das mii oaččuimet ruđa viežžat ohppiid Guovdageaidnui ja sámi joatkka- ja boazodoalloskuvlii, muitala oahppi Maret Sofie Turi.
Guovdageainnu joatkka- ja boazodoallokuvlla nuorat leat ráhkadan báji. Bájis leat iešguđetlágan stašuvnnat gos sii ohppet earet eará lávvoceggema birra, hukset sámi vistitid, gávttiid, sámi dujiid ja luđiid birra.
Olgoriikka gussiin lei maiddái vejolašvuohta oahppat veaháš sámegiela. Loahpas sámegiel bájis lea eksámen, ja sii ožžot diploma go leat čađahan eksámena.
– Bádji lea mannan hui bures, ja nuorat leat leamašan sihke movttegat ja árjjalaččat, mojohallá Turi.
Geahččaladdamin sámegiela
Greikalaš oahppi lea okta, dain nuorain geat leat mátkkoštan gitta Guovdageidnui. Son maid lea viggamin oahppat vehá sámegiela.
– Mu mielas lea sámekultuvra erenoamáš, ja mun in diehtán sápmelaččaid birra ovdal go dal. Lean oahppan hui olu otne, oahpaheaddjit ledje hui čeahpit. Go mun joavddan ruoktot de gal áiggun muitalit iežan skihpáriidda dán vásáhusa birra.