Esrange nammasaš gomuvuođadutkaninstituhtas Gironis dieđihit čálalaččat rakeahttabáhčimiid birra viđa gillii.
Muhto vaikko dieđut gusket duottarguovlluide gos leat eanaš boazosápmelaččat, de ii leat diehtojuohkin sámegillii.
– Dat ii leat dohkálaš. Duottarguovlluin han eai leat eará go mii sápmelaččat, danne galggaše dieđiheamit boahtit sámegillii čearuide, lohká Lasse Labba Lavdnjevuomis.
Dehálaš dieđut
Duiska-, fránska-, eŋgelas-, suoma- ja ruoŧagiella. Daidda gielaide lea čállon diehtojuohkin maid Esrange sádde ovdal rakeahttabáhčimiid.
Bealli saddenlisttus leat čearut main lea boazodoallu guovlluin gos boldon rakeahtaoasit gahččet.
Dát lea dehálaš diehtojuohkin man sisdoallu lea báhčináiggit, gosa rakeahtat fas gahččet ja maiddái diedut suddjenlanjaid birra.
Lasse Labba dadjá ahte eanaš boazosámit gal máhttet lohkat ruoŧagiela ja ipmirdit dainna diehtojuohkima, muhto su mielas lea maid dehálaš vuhtiiváldit sin geain lea sámegiella eatnigiellan.
Gearggus ságastallagoahtit
Mikael Viertotak, Esrange sihkarvuođaossodagas, ii sáhte čilget manne lea diehtojuohkin vida gillii, muhto ii sámegillii.
– Dat lea dušše leamaš vierrun maŋemus 40 jagi, dadjá son.
Seammás Viertotak dadjá ahte sis ii leat mihkkege prinsihpalaččat dan vuostá ahte čállit maiddái sámegillii ja Esrange bealis sii leat válbmasat ságastallagohtit dán ášši birra čearuiguin.