NRK Meny
Normal

Erna Solberg: – Dát gal lea mearihis čáppa guovlu

Stáhtaministara giehtatelefovdna coahkuhii moanaid gova dan beannot jándoris go lei Kárášjogas.

norsk
/
samisk
Norgga stáhtaministtar lei otne Kárášjogas, Davvi-Norggas ávvudeamen logi jagi das rájes go Sámedikki ja Ráddehusa gulahallanšiehtadus vuolláicállui. Sus lei maid áigi oahpásmuvvat guovllu kultuvrii.

GEAHČA VIDEO: Stáhtaministtar Erna Solberg beasai vásihit feara maid dan botta go galledii Kárášjoga. Reporttár: Dan Robert Larsen - Govven: Lasse Østmo ja Roger Manndal - Čuohppan: Roger Manndal

– Jáhkán ollugat máddin jurddašit, ahte Kárášjohka otne lea buoret báiki go dat mii sis lea máddin, logai stáhtaministtar Erna Solberg go čohkkedii fatnasii.

Folk står på brua og ser på statsministeren

Ollugat ledje čoagganan šaldi ala vai besset oaidnit stáhtaministara.

Foto: Dan Robert Larsen / NRK

Čáppa beaivvadahkan ja vuodjagoalkin leigga Norgga stáhtaministtar ja sámediggepresideanta ikte fanasmátkis Kárášjoht alde. Dát lei duođai stáhtaministara miela mielde.

– Buorre go dát mátki ii lean ikte. Dalle gal lei mearihis arvi, šuohkiha stáhtaministtar.

(Ášši joatkašuvvá ášši vuolábealde)

Govven/čuohppan: Dan Robert Larsen

GEAHČA VIDEO: Dán videos oainnát mo lei stáhtaministara fanasmátkis. Govven/čuohppan: Dan Robert Larsen

Logi jagi ávvudeapmi

Árabuš beaivet lei Solberg Sámedikki guossin. Doppe son lei mielde ávvudeamen dango gulahallansoahpamuš Ráđđehusa ja Sámedikki gaskkas vuolláičállui logi jagi áigi.

Sámediggepresideanta ii loga soahpamuša doaibman áibbas numo galggai.

– Mis leat muhtin ovdamearkkat, eaŋkiláššit gos Sámediggi ii leat beassan konsulteret Ráđđehusain, cuiggoda Keskitalo.

Soahpamuša mielde galggašedje stáhtalaš eiseváldit jearrat Sámedikkis rávvagiid áššiin mat erenoamážit gusket sámi álbmogii.

– Oainnán ahte mii álo sáhttit šaddat buoret. Gulahallansoahpamuš lei riidogaskaoapmin muhtin birrasiin dallego dat bođii, ja ádjána maid ovdalgo buot stáhtalaš etáhtat gerget heivehit dákkár ortnegiidda, čilge Solberg.

– Buorre ovdamearkan

Stáhtaministtar čájehii stuorra beroštumi go galledii báikkálaš fitnodaga mii 30 jagi lea buvttadan ullobiktasiid.

– Dát fitnodat lea buorre ovdamearkan dasa, ahte lea vejolaš ásahit bargosajiid jus olbmos lea doarvái buorre jurdda ja duođai háliida čađahit dan, lohká Solberg.

Marit Guttorm Graven, Lemet Graven og Erna Solberg

Marit Guttorm Graven, Lemet Graven ja Erna Solberg geahčadeamen ullobiktasiid.

Foto: Dan Robert Larsen / NRK

Son gávnnai vuogas ullofáhcaid, maid fitnodatálggaheaddji bárdni dáhkidii doalahit lieggasa vaikko livččiige 35 buolašceahki.

– In jáhke leat 35 buolašceahki nu dávjá doppe gos orun, muhto dát ledje duođaid fiidná, bohkosa Solberg ja coggala fas daid alit ullofáhcaid.

– Vuogas ivdni, doapmala su gulahallanráđđeaddi Cathrine Slaaen lasihit.

Fitnodatálggaheaddji Marit Guttorm Graven lea movtta go stáhtaministtar boahtá su guossái.

– Dat gal mearkkaša hui olu. Mu mielas dat čájeha, ahte dat atná fuola smávva fitnodagain maid, lohká Guttorm Graven.

Ruovttoluotta fanasmátkái. Mo de lei stáhtaministara mielas leat Kárášjoga alde?

– Hirbmat čáppat. Vestlendda ássái lea čáhci dehálaš. Dáppe lea nu ráfálaš, rámida stáhtaministtar Erna Solberg Kárášjoga luonddu.

Erna Solberg og John Nystad

Erna Solberg ja John Nystad moadde minuhta ovdal fanasmátki. Nystad turistafitnodat dat láigohii fatnasiid.

Foto: Dan Robert Larsen / NRK