Erika illá dohkkehuvvui sápmelažžan iežas ruovtturiikkas

Davviriikalaš sámi konvenšuvnna dohkkeheapmi lea oalát orustan. Stáhtat ja sámedikkit eai leat ovtta oaivilis das movt galgá meroštallat gii dohkke sápmelažžan.

Les saken på norsk.

Erika Sarivaara

EHPIDEDJE SU SÁMEVUOĐA: Erika Sarivaara oaččui Israel Ruong Stipeandda 2013:s. Son gárttai badjel jagi vuordit ovdalgo oaččui máksojuvvot stipeandda.

Foto: Yle

Erika Sarivaaras ii leat nu miella šat čilget iežas garra rahčamušaid birra dohkkehuvvot sápmelažžan.

– Mun in hálit eambbo hállat dan birra almmolašvuođas. Dat lea juo bávččagahttán nu ollu, lohká son.

Dutki šattai dovddusin 2013:s go oaččui Israel Ruong stipeandda. Dát stipeanda addo jahkásaččat nuorra sápmelaš dutkái.

Muhto muhtimat oaivvildedje ahte Erika, guhte lea Davvi-Suomas bajásšaddan, ii leat sápmelaš. Nu buollái digaštallan.

Son doalahii dattetge stipeandda.

Moadde jagi maŋŋil beasai maid sámi jienastuslohkui Suomas. Dohko lea mealgat váddáseappot beassat jienastuslohkui go Norggas ja Ruoŧas.

Sápmelaš meroštallan fas áigeguovdil

Gažaldat gii lea sápmelaš, ja gii ii, sáhttá goazahit soahpamuša mii galgá suddjet sápmelaččaid rivttiid beroškeahttá riikarájiid.

Sávaldat ásahit soahpamuša dahje konvenšuvnna riegádii juo 1986:s.

2001:s mearridedje davviriikalaš ovttasbargoministarat álggahit barggu.

Dál 19 jagi maŋŋil ii leat soahpamuš vel vuolláičállojuvvon, vaikko dat dohkkehuvvui 2017:s.

Dál háliidit Sámedikkit rievdadit oasáža čilgehusas jienastuslogu birra.

Dat gáibida ođđa šiehtadallamiid.

– Earát ge besset jienastuslohkui

Tuomas Aslak Juuso

SÁMI PARLAMENTÁRALAŠ RÁĐĐI: Suoma sámedikki njunuš Tuomas Aslak Juuso jođiha maid Sámi parlamentáralaš ráđi. Ráđđi lea sámedikkiid ovttasbargo ásahus.

Foto: Vesa Toppari / Yle

Suomas ballet oainnat ahte soahpamuš addá vejolašvuođa earáide go dušše sápmelaččaide beassat jienastuslohkui.

Sámedikkiid ovttasbargo ásahusa njunuš, Tuomas Aslak Juuso čilge sin oainnu ná:

– Nie movt dál čilgejit soahpamušas jienastuslogu birra, de sáhttet earát ge, geat eai leat sápmelaččat, beassat sámi jienastuslohkui Suomas.

– Šiehtadus vuot maŋiduvvo

Norgga sámeministtar Linda Hofstad Helleland (O) ii mieđit sámedikkiid evttohussii.

Barne- og likestillingsminister Linda Hofstad Helleland

ČÁLLÁN REIVVE: Norgga sámeministtar Linda Hofstad Helleland lea čálalaččat dieđihan norgga Sámediggái ahte sii eai mieđit sámedikkiid evttohussii.

Foto: Lotte Olsen Jessa / NRK

Stuorát rievdadusat teavsttas gáibidit lasi barggu. De manná vel guhkit áigi ovdalgo soahpamuš dohkkehuvvo.

– Jus ođđasit galggaš šiehtadallat, de maŋida dat soahpamuša vel eambbo, čállá Helleland reivvestis norgga Sámediggái.

Son čállá maid ahte ráđđehus lea árvvoštallan árvalusa. Sii eai hálit ođđasit šiehtadallat.

Smávit rievdadeamit gal dohkkehuvvojit, deattuha Helleland.