Erenoamáš ollu olbmuin lea ollu vearru buorrin
Vearroetáhta lea dál sádden buohkaide 2022 vearrodieđáhusa.
– Mii leat hárvenaš dahje eat goassige ovdal oaidnán ahte ná olu máksojuvvo ruovttoluotta, dadjá Vearroetáhta divišuvdnadirektevra Marta Johanne Gjengedal.
2,9 miljovnna olbmo ožžot ruovttoluotta 44,8 miljárdda kruvnna dálá dieđuid mielde, dieđiha Vearroetáhta preassadieđáhusas. Dát lea measta 15 miljárdda kruvnna eanet go diibmá dán muttus áigge.
Vearroetáhta lea njukčamánu 14. beaivve rájes sádden eanet go 5,2 miljovnna vearrodieđáhusa. Gaskamearálaččat máksojuvvo 15.200 kruvnna vearru ruovttoluotta juohkehažžii.
Birrasiid 900.000 olbmo fertejit máksit ruovttoluotta vearu. Sii fertejit máksit gaskamearálaččat 29.800 kruvnna, dát lea unnit go diibmá, muhto veahá eanet go ovddit jagiin. 2021:s fertejedje máksit ruovttoluotta gaskamearálaččat 43.500 kruvnna.