NRK Meny
Normal

Ellos Deatnu - lihkadus viidu nuppi sullui

Moratorio lea ásahuvvon Allasullui, mii lea Dálvadasas Deanus. Ja dáinna ásahemiin Ellos Deatnu -lihkadus oaivvilda ahte dán sullos eai doaimma Norgga-Suoma ođđa deanučázádatnjuolggadusat.

Moratorio

MORATORIO: Dálvadasa Allasullui.

Foto: Preassegovva / Ellos Deatnu

Allasuolu lea Deanuleagis, Suoma bealde. Čearretsuolu, gosa Ellos Deatnu -joavku gieskat ásahii moratorio lea ges Norgga bealde.

Ná Allasullo moratorio dahká ášši riikkaidgaskasaš áššin.

Ávžžuha earáid cegget moratorio

Dálvadasa nisu Outi Pieski galledii Čearretsullo ja doppe son gulai buori vuogi mo doarjut lihkadusa. Ja moratorio livččii vuogas vuohki.

Dál sii leat ceggen eará Dálvadas olbmuiguin moratorio Allasullui.

– Deanu ášši gullá midjiide buohkaide guovllu olbmuide, cealká Outi Pieski.

Outi Pieski

SÁMI DÁIDDÁR: Outi Pieski

Foto: Dan Robert Larsen / NRK

Son sávvá earáid maid čájehit oainnuideaset ja ceggegoahtit moratorioid guovlluidasaset.

Lea dehálaš čájehit, ahte eat dohkket Deanu ođđasoahpamuša, muitala Outi Pieski.

Árbevieruid eai sáhte oastit

Dálvadasa olbmuid mielas ii oro riekta, ahte Deanučázádagas addojuvvojit bartaturisttaide vel eanet vuoigatvuoðat.

Sii čuoččuhit, ahte vaikko olggobeal olbmot leatge oastán eatnamiid, de árbevuoigatvuođaid sii eai sáhte oastit, dat čuvvot árbbi.

Dálvadasas lea dáhttu ahte báikkálaš árbi ja vuoigatvuođat sirdašuvvet boahttevaš buolvvaide.

Guolástankultuvra sáhttá duššat

Vuovdaguoikka guolástangotti ovdaolmmoš ja okta Allasullo moratorio ásaheaddjiin Erkke Ánde, Antti Katekeetta, ballá deanusoahpamušša duššadit guolástankultuvrra ja maiddái sápmelašvuođa ja giela.

Mátta-Suomas mánát veahkehallet dálu bargguin.

Dát vejolašvuohta ii leat Erkke Ándde mánáin. Son ferte iežas gánda guođđit gáddái go vuolga joga ala.

– Ii mu gánda oaččo boahtit munnje veahkkin buođđut ge. Dathan lea olles olmmošlašvuođa vuostá, cealká Erkke Ánde, Antti Katekeetta.

Garnfiske i Tanaelva

FIERBMEBIVDU: Ballet dáid kultuvrraid loahpas duššat.

Foto: Ksenia Novikova / NRK