Olbmot besset gullat musihka Elle Márjá Eira dokumentáras «Ealát», mii diibmá čájehuvvui TIFF:s.
– TIFF:s jerre diibmá jo sáhtášingo doallat dáppe Tromssas filbmakonseartta, gos mii čuojahit filbmamusihka. Dasa mihten, muitala Eira.
Elle Márjá Eira lea ráhkadan filmma koronadilis.
Foto: Marie Louise SombyOdne dollo konsearta Alfheim-vuojadanhállas. Dát lea okta Tromssa visttiin, maid dovddus arkiteakta lea sárgon.
– Alfheim-vuojadanhálla lea miellagiddevaš ja erenoamáš čuojahanbáiki. Jáhkán dat addá erenoamáš dovddu leat doppe. Ii leat miige dábálaš konseartabáikkiid. Livččii suohtas jus olbmot livčče vel sáhttán vuojadit go mii čuojahit, leaikkastallá Eira ja bohkosa.
– Erenoamáš čuojahanbáiki
Ovttas Riddu Riđđu -festiválain čájeha TIFF erenoamáš audiovisuála konseartta Elle Márjá Eirain.
«Ealát» filmma ráhkadii Eira fárrolagaid Ken Are Bongoin diimmá TIFF:i. Festivála lei su bivdán filmmain govvidit koronadili.
– Norga lei dalle goasii áibbas gitta. Inge mun sáhttán deaivvadit nu olu olbmuiguin. Danne válljejin ráhkadit filmma min orohaga birra, muitala Eira.
Otná konseartabáikki sárggui Jan Inge Hovig jagis 1957. Hálla lei gárvvis jagis 1965.
Hovig lea earret eará sárgon dovddus Ishavskatedrala Sálašvákkis. Maŋimuš jagiid hállas ii leat leamaš vuojadeapmi go visti lea nu gollan ja mieskan.
– Min jietnaolbmot leat heivehan čuojahanbáikki, nu ahte doppe ii galgga leat nu olu skádja. Dál doppe galgá leat buorre akustihkka, muitala Eira.
Alfheim-vuojadanhálla lei diimmá Sámi álbmotbeaivvi oktavuođas čiŋahuvvon sámi ivnniiguin.
Foto: David Jensen / Jensenmedia– Eat leat ovdal doallan konseartta
Elle Márjá Eira lea ikte eahkedis vuosttaš geardde deaivvadan musihkkáriiddisguin.
Sii eai leat goassige ovdal čuojahan ovttas dahje doallan konseartta. Sis lea dássái dušše leamaš gáiddus ovttasbargu.
VUOSTTAŠ HÁRJEHALLAN: Ikte lei Elle Márjá Eiras ja su joavkkus vuosttaš oktasaš hárjehallan.
Foto: Sandra Márjá West / Riddu Riđđu– Dál leat musihkkárat, geaiguin mun lean ovttasbargan, boahtán deikke Skottlánddas, Eŋlánddas ja Irlánddas. Šaddá somá singuin čuojahit ovttas, illosa Eira.
Musihkkašládja maid joavku čuojaha gohčoduvvo ambientan. Dán musihkas lea deaddu jienaid skádjaivdnái. Dat lea ráhkaduvvon nu, ahte galggašii gullot «atmosfearalaš», «visuála» dahje jaskes musihkkan, mii ii bahkke olbmo ala.
– Mun hui dávjá improviseren dahje geahččalattan. Musihkalaččat in čuovo makkárge rájiid dahje njuolggadusaid. Mu musihkka lea hui rabas. Vuođđun lea luohti, sihke árbevirolaš luohti ja ođđaáigásaš luohti, čilge Eira.
Son lohká iežas liikot stoahkat iežas jienain ja geavahit iežas jiena feara man láhkái.
