Ella Marie (20): – Stuorra gudnin leat mielde

– Munnje lea stuorra gudnin beassat leat fárus. Dat han lea dego NRK váldoprodukšuvdna dál čakčat, ja mun han lean álo geahččan «Stjernekamp» ja mu mielas lea hui guoimmuheaddji geahččat.

– Mun háliidan maid dál guoimmuhit olbmuid ruovttuin. Dat šaddá hui somá, lohká Ella Marie Hætta Isaksen.

Nuorra sápmelaš lea okta logi násttis geat leat mielde dán jagi «Stjernekamp»-gilvvuin. Gilvu álgá eahkedis odne ja bistá logi vahkku.

– Mun lean dieđusge nuoramus dáppe, ja mun in leat seammá hárjánan go dat earát. Mun jáhkán olu geahččit sáhttet dovdat mo mus lea go mun oainnán daid olu násttiid.

– Mu oainnu mielde dat leat olu stuorát násttit go mun.

Lávlu Paramore-lávlaga

Juohke prográmmas leat iešguđet musihkkašlájat mas artisttat galget gilvvohallat. Vuosttaš prográmmas lea fáddan rock, ja Ella Marie lea válljen Parmore lávlaga «Misery Business».

– Mun válljejin dán lávlaga go dát lea mearihis stuorra hástalus. Mun háliidan iežan rájáid iskat, inge gille dahkat dušše dan maid máhtán. Dasa lassin lean álo liikon joavkku lávlui, Hayley Williams, čilge son.

Vaikko son lea dušše 20 jagi, de lea jo geargan vásihit olu artistan:

• Vuoitán Sámi Grand Prix jagis 2016 iežas čállán lávlagiin «Luoddaearru».
• Jagi maŋŋá son seammá lávlagiin vuittii Eurohpálaš unnitgielaid lávlongilvvu Liet International.
• Guoimmuhii Spellemannprisen-bálkkašumis, go Mari Boine dán jagi oaččui gudnebálkkašumi. Dás Ella Marie lávllui erenoamáš veršuvnna Boine lávlagis «Elle».

Ella Marie lassin leat dát ovccis mielde dán jagi Stjernekamp-gilvvuin:

Hilde Louise Asbjørnsen (42), Maria Arredondo (32), Dag Ingebrigtsen (59), Ulrikke Brandstorp (22), Ole Børud (41), Heine Totland (47), Alexander Pavelich (29), Chris Holsten (25) ja Samantha Gurah (32).

Ii jáhke iežas vuoitit

Ella Marie lea guktii oassálastán lávlongilvvuin, ja guktuid gerddiid vuittii.

– Mun dovddan, ahte vuordámušat leat veahá ahte galggašin dego álo dahkat buorebun dan maid mun lean dahkan. Geahččalan muittuhit iežan, ahte dat lea vuoitun dušše leat mielde. Dás han lea 90 proseantta vejolašvuohta, jus oaidná nie, ahte mun in leat fárus gitta lohppii, muittuha Ella Marie.

Sus lea iežas favorihtta.

– Alexander Pavelich lea mearihis čeahppi. Galgabehtet gullat su odne go lávlu. Hirbmat čeahppi, dadjá Hætta Isaksen.

– Ferten dušše giitit! Orru veahá issoras go nubbi artista lohká mu favorihttan. Sávvamis manná nu mo son árvala, lohká Alexander Pavelich.

Jagis 2013 lei unjárgalaš Agnete Kristin Johnsen mielde Stjernekamp-gilvvuin. Son birgii bures ja beasai gitta loahppagilvui. Doppe šattai nubbin. Silya Nymoen vuittii.

Gilvošlájat 2018

Muhtin musihkkašlájat nu mo hiphop ja opera leat leamaš mielde prográmmaráiddus álggu rájes. Eará šlájat molsašuvvet jagis nubbái.

Dát musihkkašlájat lea mielde dán čavčča:

• Rock (25.8)
• Country (1.9)
• Hiphop (8.9)
• Soul (15.9)
• Opera (22.9)
• Blues + joavkohástalus (29.9)
• EDM + visalávlla (6.10)
• Garrarock + luohti (13.10)
• Musikal + ovttaslávlon ovddeš Stjernekamp-artisttain (20.10)
• Loahppagilvu (27.10)

– Buot šaddá somá. Šaddá somá geahččalit ráppet, jus dohko beasan. Opera maid livčče somás vásáhus. Luođis várra navdet mu čeahppin ja livččii suohtas dien prográmmii joavdat, sávvá Ella Marie.

Prográmmaráiddus ii leat makkárge namma sámegillii, muhto jus dan jorgalivččii de šattašii namma «Násttit gilvalit».