Normal

Elin Kåven ávvuda logi jagi artistan skearroalmmuhemiin: – Dego ođđa álgu

Elin Kåven lea juoigagoahtán ja máhccan fas iežas kultuvrii maŋŋel logi jagi artistan go lea olu čuojahan olgoriikkas.

Elin Kåven

Elin Kåven ávvuda dál logi jagi artistan

Foto: Freddy L. Larsen / NTB Tema

Odne almmuha Elin Kåven skearru «Eamiritini - Rimeborn» davviriikkain.

– Dát skearru ávvuda mu logi jagi artistan, ja munnje dovdo dat dego ođđa álgu. Mun lean olu rievdan dán logi jagis dan ektui ahte manne lávllun. Álggos lávlon somá dihte. Dál lea šaddan eambbo nu ahte háliidan lávlut dan dihte vai sáhtán čájehit iežan sámivuođa.

Máhccan iežas kultuvrii

Son lávlugođiige sámegillii go massigođii sámegiela maŋŋel go lei fárren eret Sámis.

– Fuobmájin ahte in leat šat nu čeahppi hállat sámegiela, ja dikšugohten giela teakstačállima bokte.

Odne disdaga guovvamánu 16. beaivvi son doalláge almmuhankonseartta UHØRT olggobáikkis Oslos. Sus leat mielde čuojaheaddjit Espen Wensaas ja Daniel Lazar.

– Mun lean hirbmadit plánen dán konseartta, go dát skearru šattai dan muttos erenoamážin munnje. Go fárrejin fas Sápmái, de lea luondu addán nu olu inspirašuvnna munnje dán ođđa skerrui. Lean juoigagoahtán ja máhccan fas iežan kultuvrii.

Lihkostuvvan Duiskkas

Kåven almmuhii iežas goalmmát musihkkaskearru Duiskkas ovdal juovllaid. Doppe nammaduvvui evttohassan «German Record Critics’ Award» musihkkabálkkašupmái , maid duiska musihkkaárvvoštallit juhket.

– Šaddá speanta davviriikkain almmuhit skearru maŋŋá go manai nu erenoamáš bures Duiskkas, lohká Elin Kåven davviriikkaid skearroalmmuheami birra.

Oahppan olu iežas kultuvrra birra olgoriikkas

Elin Kåvena mielas lea álo leamaš suohttaseamos doallat konsearttaid olgoriikkas. Doppe guldalit su musihka earaládje go Norggas, ja nu son lea ieš maid oahppan dovdat iežas kultuvrra buorebut maid.

– Norgga guldaleaddjit leat hui váddásat, go eai dieđe movt galget guldalit ja makkár oktavuohta sis lea sámiiguin. Sápmelaččaide leages musihkka váimmu lahka, sii liikojit dan bures. Olgoriikkas leages áibbas eará. Sin mielas lea sámi musihkka nu eksohtalaš. Sii beroštit das hirbmosit.

Son muitala oahppan hui olu iežas kultuvrra birra go lea ožžon gažaldagaid olgoriikkas sámi kultuvrra birra.

Šadden smiehttagoahtit mii lea erohus, muitala Elin Kåven, gii lea doallan konsearttaid earret eará Duiskkas, Aserbajdsjanas, Japanas, Eŋglánddas ja Sveitsas.

Ii sáhttán luonddus konsearta, muhto luondu lea goitge mielde

Rievtti mielde háliidii son doallat almmuhankonseartta meahcis, luonddus, muhto ii dat menestuvvan. Dan dihte lea baicca ráhkadan video luonddus, maid áigu čájehit Oslos almmuhankonsearttas.

– Lean ráhkadan smávvalágan video. Lean doallan iežan almmuhankonseartta meahvis Álttás, gos dál orun, ja lean doppe juoigan ja lávlon. Dan lean filbmen ja áiggun čájehit dán video almmuhankonsearttas, muitala Elin Kåven.