– Naa, dat ii mannan justa nu bures mo geahččaleamen manai, muhto dat han láve nie ahte jus generála geahččaleapmi ii mana nu bures, de manná buoret dan váldo oasis, vástida Elin Kåven go NRK jearrá makkár dovdu lea maŋŋá generála čađaheami.
Kåvena mielas lei menddo ollu suovva.
– Nu ahte in jáhkke mun ba oidnon ge dieppe álggus, ja de vajáldahtten buot maid galgen bargat.
– Váttis diehtit gii vuoitá
Elin Kåven ja Robin Lynch, dahje Elin & The Woods, čuojaheaba lávlaga «First Step In Faith / Oadjebasvuhtii» Norgga Melodi Grand Prix finálas.
Robin Lynch sávvá ahte vuoitiba otne, muhto dovddasta ahte son lea eahpesihkar.
– Dáppe leat ollu buori lávlagat, nu ahte lea váttis diehtit gii vuoitá. Olbmot fertejit jienastit jus liikojit munno lávlii, dadjá Lynch.
9. lávlla lávdái
Logi artisttat buohkat doivot beassat Norgga ovddastit Kievas Ukrainas. Elin & The Woods lea eahkeda ovccát lávlla lávddis.
- Geahča Melodi Grand Prix finála dás – njuolgga diibmu 2055
Dán jagi leat ođđa jienastannjuolggadusat. Jienasteapmi dahko guovtti vuorus. Álggus lea álbmoga jienat, muhto maiddái logi riika Eurohpás geat jienastit iežaset favorihtaid. Álbmoga ja dat nu gohčoduvvon Eurohpá jienain lea seamma stuorra árvu, 50 proseantta goabbatge.
Das maŋŋá besset njealjis oktii vel lávlut, dan nu gohčoduvvon «Gollefinálaš» ja ođđa jienasteapmi dahko.
«Gollefinálas» lea dušše álbmot guhte mearrida, ja lávlla mii oažžu eanemus jienaid šaddá MGP 2017 vuoiti, ja galgá ovddastit Norgga miessemánus Ukrainas.
