– Dat dovdu hui bures, mun gal lean duhtavaš. Dieđusge lei miella vuoitit, muhto jo jo, ii dat sáhtte das maidige, dadjá Elin Kåven.
Son ja Robin Lynch šattaiga goalmmát sadjái Norgga Melodi Grand Prixas, «First Step In Faith / Oadjebasvuhtii» lávlagiin. Dattetge eaba beasa mannat Kievii ovddastit Norgga Eurovision finálas.
Maiddái Jon Henrik Fjellgrän šattai goalmmát sadjái Ruoŧa Melodifestivalenis.
Ihku feasta
Elin & The Woods áiguba mannat festii.
– Dál lea dárbu dahkat juoidá eará. Olles vahku letne ráhkkanan dása, nu ahte šaddá buorre festet veháš, dadjá Kåven.
Geahči guoktá geat leigga mátkkoštan Osloi gitta Kárášjogas vásihit MGP-finála gal leaba duhtavačča.
– Lei máilmmi somá dáppe Oslo Spektrumis beassat gullat Elina juoigat, dadjá John Nystad.
– Mii leat ožžon goalmmát saji, ja dainna mii galgat leat hui movtta ja ilus, dadjá Mette Antii Gaup.
Vuoiti šattai JOWST geas lei electro-popa lávlla, «Grab The Moment».