– Ollugat dorjot gal min, muhto lohket ahte eai hálit leat miellahtuin jos eai sáhte leat čeagus miellahtut, lohká EDL nubbejođiheaddji Turid Bjørnstrøm.
– Aktivistat mávssahit
Organisašuvnna Etnisk og demokratisk likeverd (EDL) nubbejođiheaddji Turid Bjørnstrøm lohká ollu jearaldagaid oččon miellahtuvuođa ja organisašuvnna birra.
– Ollugat dorjot, muhto de lohket ballat maid aktivistat sáhttet dahkat bárttain ja dáluin mat sis leat, danin eai searvva, čilge Bjørnstrøm.
Boldet bárttaid
Turid Bjørnstrøm ii sáhtte gal lohkat geat dát aktivisttat sáhttet leat, muhto vuohttá olbmuin ahte EDL miellahtun ballet gohčoduvvot rasistan.
EDL lea Finnmárkku organisašuvdna mii ásahuvvui mannan jagi.
– Lea šallošahti go organisašuvnna gohččodit rasistálaš searvin ja go nie galget baldit olbmuid searvamis servvodatdigáštallami, lohká eddon Turid Bjørnstrøm.
Ii jáhke dasa maid gullá
NSRa jođiheaddji Silje Muotka ii sáhte váldit dieid dieđuid duođas, go NRK Sámi Radio čilge suinne EDL nubbejođiheaddji Turid Bjørnstrøm balu.
– Mon gal in duostta váldit dán duođas ja orru ahte EDL dál fievrreda servvodatdigáštalla eret duohtavuođas, loahpaha Silje Muotka.
