"Etniid Ulloliinnit" bidjá gehččiid jurdagiid johtui: - Dát ii leat amas fáddá

Mii boahtit sisa kultursálii gos Ozas nammasaš prošeavtta čájálmas «Etniid Ulloliinnit» fargga álgá. Seainnis jorrá video gos vuoras áhkku gođđá ulloliinni.

Sánehis muitalus

Čájálmas álgá dánssain. Lávddis leat čuojaheaddjit ja dánsejeaddji Rebekka Andresen. Son dat lea tulkon dán čájálmasa muitalusa dánsan.

– Risten Anine guovttos Sara Marielliin leaba čilgen munnje dán muitalusa ja daid luđiid vai mun sáhtán dulkot daid lihkademiin ja dovdduin. Ahte mo lea hearki dahje kievra, ja mo lea leat nissonolmmožin, muitala Andresen maŋŋel čájálmasa.

Viidáseappot muitala son ahte sii leat ovttasbargan koreográfain Gunnhild Bjørngårdain, ja de lea maid olu improvisašuvdna.

– Mus ii leat čielga vástádus justa mo mun dagan dán, muhto dat lea dego lihkadeapmi dovdduid vuođul. Nu ahte mun muitalan muitalusa iežan gorudiin, lohká Andresen.

Eat sáhte jávohaga

Muitaleaddjit leaba oappážagat Risten Anine Gaup ja Sara Marielle Gaup Beaska.

Soai leaba válljen muitalusa mas lea losses fáddá, ja dat vulggii dalle go MeToo ja SápmiToo beaggigođii. Seksuálalaš unohisvuođat ledje dieid bokte oidnosis miehtá máilmmi.

– Munno áigumuš čájálmasain lea geahččalit guoskkaldahttit fáttá. Moai háliidetne ahte olbmot galget dovdat iešguđet dovdduid, ja diet soaitá boktit ságastallama, muitala Sara Marielle.

• Loga maid: Ođđa dutkan sámi nissoniid dili birra

MeToo ja SápmiToo lei dego bárru. Álggos lei olu sáhka seksuálalaš unohisvuođain, muhto de orui ahte jaskkodii. Dat ii orron riekta sudno mielas. Risten Anine oaivvilda ahte dát ii čuoza dušše sámi servvodahkii.

– Mun jáhkán ahte dát ii leat amas fáddá gehččiide, leaš dál sápmelaš dahje gii dál de. Don leat gullan dán fáttá birra, dadjá Risten Anine.

Sara Marielle joatká, ja dadjá ahte measta buohkat dovdet soapmása gii lea vásihan juoidá mii lea bahá ja lossat. Sudnuide lea dát čájáhus álgun, ja lohkaba iežaska áigut joatkit dáinna fáttáin bargat.

Nuorra lávlu

Etniid Ulloliinnit čájálmasas leat máŋga muitalanvuogi; dánsa, luohti, musihka ja lávlla. Lávlu lea Máret Áile Gaup Beaska, Sara Marielle nieida.

Son lea ieš čállán, muhto eai lean álggos jurddašuvvon dán čájálmassii. Eadni Sara Marielle lei gullan daid lávlagiid, ja su mielas heivejedje bures.

– Mu nu háliidin lávlagiid mielde dása, ja lihkus vulggii ieš nai mielde, lohká Sara Marielle.

Ulloliidni

Dat mii lea guovddážis olles čájálmasas, nu go namma maid muitala, ulloliidni. Dat lea dakkár duodji man árbevirolaččat duddjojedje ruovttuin.

– Don sáhtát árbet liinni áhkus dahje eatnis. Dat čuovvu du eallima čađa. Dan rájes go leat unna mánáš de du eadni dahje bearaš, dikšu du ja ulloliidni lea oassin dan dikšumis, muitala Risten Anine.

Su gieđat čájehit muitalettiin mo lebbe liinni ovdal bidjá máná dan ala, ja čilge ahte liidni maiddái lea suodjin mátkkoštettiin. Dađistaga go mánná stuorru, de rievdá liinni geavaheapmi, ja loahpas šaddá čikŋan nuorra nieiddaide.

Dat lea maid gárvu mii čatná oktii buot sámenissoniid. Ulloliidni lea anus miehtá Sámi.

– Jus don leat gávpogis ja oainnát muhtun olbmos ulloliinni, de dieđát ahte son gullá du álbmogii, lohká Risten Anine.

• Loga maid: Sexy Sápmi soaitá rahpat sámi servodaga

Muitalus buohkaide

Go dákkár fáttáin bargá, de ferte válljet mo bargá ja movt dan čájeha lávddis. Doppe leat muhtun oasit mat leat oalle garrasat, nu go goanstavarra, garra musihkka ja lihkasteamit.

– Moai háliidetne áinnas dan positiiva beali maid atnit, nu go searvevuođa. Ja nu go oabbá logai, dat liidni han nanne min searvevuođa ja identitehta. Ahte dat dikšu min. Liidni dat addá dan buori, čilge Sara Marielle.

Seksuálalaš unohisvuođat ja veahkaválddálašvuohta lea dađi bahábut oahpes fáddá nissoniidda, gos dál máilmmis de oroše.

– Muitalus lea buohkaide. Muhto moai muitaletne dan sámi perspektiivvas, loahpaha Sara Marielle.

• Loga maid: Minister åpnet SápmiToo utstilling