NRK Meny
Normal

Eastadit vealaheami juoigama bokte

Nannen dihte sámivuođa ja eastadan dihte vealaheami, de leat Várjjat-skuvllat álggahan juoiganprošeavtta. Dál áiggoše dán bargovuogi eará sadjái

Eastadit vealaheami juoigamiin

Mátta-Várjjaga mánát guoimmuhedje juoigamiin odne iđit pedagogalaš konferánssa rabadettiin dáppe Girkonjárggas.

Tove-Lill Labahå Magga

Tove-Lill Labahå Magga

Foto: Piera Balto/NRK

Buorit bohtosat

– Buot gieldda skuvllat ja mánáidgárddit leat viđa jagi badjel čuvvon juoigan- ja kulttur oahpahusa, ja das leat buorit bohtosat. Oahpaheaddjit leat vávján sámemánáid dohkkehuvvot buorebut, nu ahte bargu lea leamaš ávkkálaš buohkaide, ii dušše sámemánáide, muitala konferanssa logaldalli Tove-Lill Labahå Magga

Várjjat guovllus lea sámemánáin leamaš negatiiva identitehtadovdu, ja dan leat dáinna oahpahusain nagodan jorgalahttit.

– Go stuorrulit, de sáhttet vásihit bilkun ja čaimmahussan šaddat, muhto dát mánát leat dego boahkuhuvvon dan vuostá ja bastet dalle leat baicce bealušteadddjin sámekultuvrii, dadjá Labahå Magga.

Mánát Mátta-Várjjaga juoiganprošeavttas, Mads ja Ellinor

Mánát Mátta-Várjjaga juoiganprošeavttas, Mads ja Ellinor

Foto: Piera Balto/NRK

Mads ja Ellinor, geat leigga mielde guoimmuheamen, liikoba goappašagat juoiggastit.

– Mis lei mánáidgárddis juoigangilvu ja de máhtten hui bures juoigat, muitala Mads.

– Lea somá, go mun dovddan iežan hui friddjan go juoiggan, dadjá ges Ellinor.

Eará sajiin maid beroštupmi dása

Oahpahusa bohtosat leat nu buorit ahte dasa lea badjánan beroštupmi eará guovlluin, muitala prošeaktajođiheaddji Annemarie Kjeldsø.

– Go mii leat jođašan ja logaldallan juoiganoahpahusa birra, de lea dat bures váldon vuostá, muitala Kjeldsø.