Risttalaš konfirmašuvnnat ain eanetlogus, muhto gávpogiin lea eará «treanda»

Norgga stuora gávpogin válljejit eanet nuorat human ehtalaš vuogi mielde konfirmerejuvvot, muhto dađi davvelii boađát dađi eanet maid risttalaš konfirmánttaid gávnnat.

human-etisk konfirmasjon er blitt populær i byer, men i distriktene dominerer kristelig konfirmasjon

Geahča video

Kárášjoga girkobálvá lea girkodáhki nalde gokčamen ráiggi skifer-geđggiiguin. Den Norske Kirke beaivválaš jođiheaddji Åsmund Samuelsen ges čuožžu vuollin ja geahččá.

– Go muohta luovvanii robi nalde de bohte hui máŋga skifer-geađggi maid muohttaga fárus, ja dalle goaikugođii čáhci girku siste, čilge Samuelsen.

Báhppa Jan Høifødt ges lea girku váldolanjas dárkkisteame goaikugo ain čáhci doppe.

– Livččii heahpat čáhceskálluid bidjat miehtá girku, dadjá báhppa.

Juohke guđat vállje risttalaš konfirmašuvnna

Vaikko giđđabivvalat dagahedje ráiggi Kárášjoga girku dáhkkái, de geasuha girku ain konfirmánttaid.

– Ii leat bahá ge go ođđaáigge servodagas vállje measta juohke guđat konfirmerejuvvot girkus, dadjá báhppa Høifødt.

Diibmá ledje Norggas 61.592 14-15 jahkásačča. Sis válljedje 37.384 nuora risttalaš konfirmašuvnna.

Dán jagi ledje Norggas 60.968 14-15 jahkásačča. Sis válljejedje 10.509 human-ehtalaš konfirmašuvnna. 17,4 proseantta.

– Stuorát gávpogiin leat humánalaš konfirmašuvdnafálaldat, muhto ii buot báikkiin, dadjá Bente Sæter, Human-ehtalaš organisašuvdnačálli.

Human-ehtalaš konfirmašuvnnat lassánit

Juohke jagi njiedja risttalaš konfirmánttaid lohku, seammás go human-ehtalaš konfirmašuvnnat lassánit.

Human-ehtalaš, dahje nammalassii «borgerlig» konfirmašuvnnat lassánit eanemusat gávpogiin.

– Go olmmoš fárre eret báikkis, gos sis leat árbevierut ja bearrašat, ja fárre gávpogii. De massá olmmoš osiid bearašárbevieruid. Ii masse buot, muhto čanastumit eai leat šat nu nannosat, dadjá báhppa Jan Høifødt.

Báhppa lea oadjebas ahte sámi guovlluin nugo Kárášjogas ja Guovdageainnus earenoamážit bissu konfirmašuvdna nugo dál lea.

– Kárášjogas konfirmerejuvvojit measta buohkat girkus, dadjá báhppa.

Duorastaga diibmu 1800 galget konfirmánttat girkui gažadeapmái.

Lohpida goike girku

Girkobálvá gizzu fas dáhke nala ja bidjá eanet skifer-geđggiid. Ráigi ii bálljo oidno šat.

– Dalle lea bidjat dán moadde geađggi vel ja dalle šaddet konfirmašuvnnat. Girkus lea goikkis go čáhci ii golgga šat, lohpida girkobálvá Rolf Isaksen.