Bargiidbellodaga sámediggeáirras ja Mátta-Várjjaga gielddastivrra áirras Mariann Wollmann Magga lea ilus ovdagotti mearrádusas. Mátta-Várjjaga gielddastivra mearrida ruhtajuolludeami loahpalaččat čakčamánus.
Bargiidbellodaga politihkkár Mariann Wollmann Magga lohká dehálažžan čohkket Savio dáidagiid.
Foto: Máren Iŋgá Baer– Dát lea illusáhka munnje. Mun ja máŋga eará leat guhká bargan dáinna ja juo jagi 2003 rájes leat bargan oažžun dihtii čoakkáldaga Saviomuseai.
Lea dáiddačoaggi Niels Christian Bang guhte eaiggáduššá Savio-dáidaga maid áiggošedje máhcahit ruovttoluotta Mátta-Várjjagii, Saviomuseai.
Dehálaš čohkket
Ovddalgihtii leat juo Sámediggi, Finnmárkku fylkkagielda, ja Deanu ja Várjjat museasiida juolludan ruđa John Andreas Savio dáiddačoakkáldaga oastimii, mas leat 490 Savio dáidaga ja mii máksá oktiibuot birrasii vihtta miljovnna ruvnnu.
Saviomusea čoaggá, dutká ja vurkkoda John Savio dáidaga ja sis leat 389 Savio dáidaga museas.
– Lea dehálaš ahte Savio dáidda oažžu dan saji maid dat ánssáša ja ahte ovtta báikái lea čohkkejuvvon nu olu su dáidda go vejolaš. Dát mearkkaša olu gildii, sápmelaččaide gielddas ja olles Sápmái, dadjá Wollmann Magga.
Váilu ain ruhta
Dál váilu vel 600.000 ruvnnu oastit dáiddačoakkáldaga, muhto Mariann Wollmann Maggas lea jáhkku dasa ahte nagodit gávdnat dán ruđa.
– Gieldda ráđđealmmái áigu bargat dáinna ja čohkket ruđa mii vel váilu. Lean sihkar ahte mii nagodit dan, dadjá son.
