NRK Meny
Normal

Eanemus vuoittut Ruššii

Ruošša beale fággádallit faskejedje eanemus vuoittuid Deanu Cupas dáid basiid. Moadde Finnmárkku fággádalli maid birgejedje bures gilvvuin.

Åpning av Tana Cup 2015.

RUOŠŠA BIRGETMEAHTTUN: Fággádallan gilvu Deanu Cup lágiduvvui dáid basiid 11. geardde.

Foto: Frode Gundersen

– Ruošša fággádallanjoavkkus ledje sihke máilbme – ja eurohpámeašttir gilvvuid vuoitit de dalle olmmoš juo diehtá ahte sis beassá oaidnit alla dási fággádallama, lohká Deanu Cup jođiheaddji Frode Gundersen.

Badjelaš 250 fággádalli Norggas, Ruoššas, Suomas ja Ruoŧas ledje searvan dán jagáš Deanu Cupii.

Mamedov birgetmeahttun

Shuai Mamedov, Murmánskas eret, guhte earret eará lea boahtan nubbin Ruošša meašttir fággádallan gilvvus, vuittii dievdduid 75.kg senior luohká.

Nubbin dán luohkás bođii Vladislav Kazantsev, Guoládaga fággádallansearvvis. Goalmmádin ges Narviikalaš Jon-Eirik Sommerseth (Narvik AK).

Mamedov nammaduvvui maid dán jagáš Deanu Cup buoremus fággádallin oppalaččat.

Bronsa Detnui

Vuosttas geardde lei maid Norgga riikajoavku searvan nissonjoavkkuin Deanu cupii. Finnmárkkus leat moadde fággádalli riikajoavkkus ja moattis dáin dat birgejedje bures Deanu Cupas.

18 jahkásaš nuoraid 60 kg luohká vuittii Cesilie Magnussen, guhte lea Norgga riikajoavkkus fággádallamis. Nubbin dán luohkás bođii Ruoŧa nieida Minna Ridderstråle (BK Snar) ja goalmmádin ges Gunn Rita Boine, guhte lea Deanus eret. Son ge gullá riikajovkui.

Nissoniid senior luohká vuittii ruošša nisu Nadezhda Sokolova (Veliky Novgorod). Nubbin dán luohkás ges Amanda Wikman Jielleváris Ruoŧas eret.

Várggáid nisu, Ramona Eriksen, guhte maid lea Norgga riikajoavkkus bođii ges goalmmádin senior luohkás.

Signe Marie Fidje Store og Gunn Rita Boine

Deanunieida Gunn Rita Boine (Olgeš bealde) lea olu jagiid juo leamaš Norgga buoremus fággádalliid searvves iežas luohkás. Dás govas lea vel Signe Marie Fidje Store, guhte maid fággádallá Deanu fággádallansearvvi ovddas.

Foto: BK Tana