Dát čoahkkin dollojuvvo dan dihte go bidjet eanet ja eanet návccaid Barentsovttasbargui. Nu čilge Christina Henriksen gii lea Barentsčállingotti eamiálbmotráđđeaddi.
Čoahkimii bohtet Sámedikki presidenta Egil Olli, gii maiddái lea Sámi parlamentáralaš ráđi presidenta, Sámeráđđi ja Sámi nissonforum.
Čoahkkimii searvá maid RAIPON nammasaš organisašuvdna mii lea Ruošša organisašuvdna davviguovllu olbmuide. Presidenta, várrepresidenta ja okta hálddahusas bohtet čoahkkimii.
Maiddái Barents eamiálbmot bargojoavkku jođiheaddji Bjarne Store-Jakobsen oassálastá.
Henriksen muitala ahte sii áigot buktit ovdan olgoriikkaministarii evttohusa eamiálbmotprošektii.
Dát čoahkkin lágiduvvo dan oktavuođas go Norgga olgoriikkaministtar Jonas Gahr Støre deaivá Ruošša olgoriikkaministara Sergej Lavrova Girkonjárggas odne.