– Álgoálbmotnamma geatnegahtášii ráđđehusa ja Stuorradikki buorebut váldit vuhtii earret eará Sámedikki oainnuid, dadjá Norgga olmmošvuoigatvuođa ásahusa, NIM, direktevra Laila Susanne Vars.
Norgga olmmošvuoigatvuođaid institušuvdna, NIM lea dál geigen jahkedieđáhusas Norgga stuorradiggái. Dás buktet 28 ávžžuhusa iešguđetge fáttás.
NIM rávve earret eará Stuoradikki rievdadit Vuođđolága paragráfa 108 nu ahte sápmelaččat namuhuvvojit eamiálbmogin dan sadjái go «álbmotjoavkun».
– Dat dávista buorebut dan riikkaidgaskasaš ovdáneami, nu ahte das máid boahtá ovdan ahte sápmelaččat leat álbmot ja álgoálbmot.
«Álbmotjoavku» doaba láivi
Maiddái Sámiráđi olmmošvuoigatvuođa ossodaga hoavda Magne Ove Varsi oaidná «álbmotjoavku» doahpaga láivin.
Son oaivvilda dát nanne gielddaid ja filkkadikkiid váikkuhanvejolašvuođa sámi áššiid ektui.
– Das lea stuorra erohus go «álbmotjoavku» lea dego oassi dan dáža álbmogis, ja dalle das ii leat áibbas čielgasit vuoigatvuohta iešmearrideapmái, dadjá Varsi.
Ođđajagimánus jienastedje Stuorradikkis dán áššis. Stuorradiggi ii atnán dárbun rievdadit vuođđolága.
Varsi muittuha movt »álgoálbmot» doahpaga vuostálastit ákkastalle.
– Sii ballet ahte sámit ožžot lasi vuoigatvuođaid, ja diet čájeha ahte sii leat ádden makkár mearkkašupmi das lea ahte diet sátni geavahuvvo Vuođđolágas.
Sávvá olahit rávvagiiguin
Norgga olmmošvuoigatvuođa institušuvnna, NIM, bargun lea rávvet ráđđehusa ja eará Norgga almmolaš orgánaid olmmošvuoigatvuođaid ektui.
Jahkedieđáhusastis dat ávžžuha maid ahte:
- Konsultašuvdna geatnegasvuohta nannejuvvo lágas, ja ahte gielddat ja fylkkagielddat maid leat geatnegahtton dasa.
- Rievdadit boazodoallolága nu ahte boazologu gáibádusat čuvvot olmmošvuoigatvuođaid.
NIM direktevra Laila Susanne Vars lohká dán rádjái leamaš váttis olahit rávvagiiguin.
– Dađi bahábut mii oaidnit ahte erenoamážit sámi riekteáššiin lea váttis oažžut ráđđehusa dohkkehit min rávvagiid.
Ráđđehusa sámeáššiid stáhtačálli Anne Karin Olli čállá e-poasta bokte, ahte ráđđehus dál váldá NIM:a ávžžuhusaid duođas, ja sii árvvoštallet daid vuđolaččat.
- Loga maid:
- Loga maid: