– Dál leat eamiálbmogat ráđđádallan guokte beaivve stáhtaiguin ja ON:in ja nagodedje soahpat, lohká sámediggepresidenta Aili Keskitalo gii dál lea USAs.
Soahpamuša mielde leat eamiálbmogat ja stáhtat seammá dásis go Ovttastuvvan Nášuvnnat čakčat lágidit eamiálbmogiid máilmmekonferánssa New Yorkas.
Eamiálbmotkonferánsa almmá eamiálbmogiid haga
Árabus dán jagi lei sáhka das, ahte eamiálbmogat soitet boikohttet máilmmekonferánssa dannego Ovttastuvvon Nášuvnnat eai áigon dohkkehit sin oassálastin seammá dásis go stáhtaid ovddasteaddjit.
Sámediggepresideanta Aili Keskitalo (NSR) ON-gárdimis.
Foto: Liv Inger Somby / NRKČuolbma lea almmatge dál čoavdašuvvan, ja dál servet eamiálbmogat seammá dásis go stáhtaid ovddasteaddjit.
Sámediggepresideanta Aili Keskitalo (NSR) lea álggu rájes deattuhan, ahte ferte lágiduvvot ON máilmmekonferánsa, nugo 600 eamiálbmoga diibmá sohpe Álttás Finnmárkkus.
New Yorkas ON gárdinis lea Keskitalo ákkastallan ja čilgen, ahte eamitálbmogiin galgá leat bissovaš áiciidsárvu. Vaikko dál sohpe, de leat ain riikkat mat cakkadit.
Gulahallančoahkkin lei dehálaš, go eamiálbmogat leat nu čielgasit cealkán manne sin haga ii šatta makkárge máilmmekonferánsa ja mat oasit galget leat sajis ovdal čavčča.
Keskitalo lohká iezas bidjan olu návccaid vai konferánssa áigomuš lihkostuvašii.
