Eambbo biebmoluossabuvttadeapmi
Finnmárkku fylkkalávdegotti eanetlohku mearridii ikte diktit Grieg Seafood-fitnodaga ásahit biebmoluossarusttega Stiertná lahka, Álttávuonas. Dušše Gurut- ja Guovddášbellodaga áirasat jienastedje vuostá. Gurutbellodaga fylkadiggeáirras Trine Noodt ballá ásaheami birasváikkuhusain. Bargiidbellodaga fylkkasátnejođiheaddji Runar Sjåstad oaivvilda baicce biebmoluossabuvttadeami dehálaš ealáhussan Finnmárkkus. Maiddái gilvaleaddji fitnodat, Cermaq Norway, áiggošii biebmoluossarusttega hukset seamma guovllus.