NRK Meny
Normal

Porsáŋggu gielda ii sáhte gáibidit ođđa proseassa

Porsáŋggu gielda ii sáhte gáibidit Finnmárkku buohcciviesus ođđa proseassa. Dan lea Dearvvašvuođa- ja fuollasuorggi riidočoavdinlávdegoddi lea gávnnahan.

Mental Helse

Porsáŋggu gielda lei váidalan Finnmárkku buohcciviesu mearrádusa heaittihit psyhkalaš dearvvašvuođasuddjema jándorovttadaga Leavnnjas.

Foto: Anne-Cathrine Reuterdahl / NRK

Njukčamánu 20. beaivve dán jagi mearridii Finnmárkku buohcciviessu heaittihit psyhkalaš dearvvašvuođasuddjema jándorovttadaga Leavnnjas.

Porsáŋggu gielda oaivvildii ahte eai lean beassan leat doarvái mielde proseassas, ovdal dát mearrádus dahkkui ja váidalii ášši dearvvašvuođa- ja fuollasuorggi riidočoavdinlávdegoddái.

Lávdegoddi lea dál gávnnahan ahte Porsáŋggu gielda ii sáhte gáibidit Finnmárkku buohcciviesu čađahit ođđa proseassa.

Eai dárkkis mearrádusa

Riidočoavdinlávdegoddi oaivvilda ahte nu guhká go fálaldat lea dohkálaš, de lea dearvvašvuođadoaimmahaga duohken mearridit bálvalusa sisdoalus.

Dan dihtii oaivvilda lávdegoddi ahte eai sáhte dárkkistit mearrádusa heaittihit bálvalusa Leavnnjas 2016:s ja sirdit dan Kárášjohkii.

Finnmárkku buohcciviessu duđavaš

Mii leat duđavaččat lávdegotti mearrádusain, dadjá Finnmárkku buohcciviesu beaivválaš jođiheaddji Torbjørn Aas.

Torbjørn Aas

Finnmárkku buohcciviesu beaivválaš jođiheaddji Torbjørn Aas lea duđavaš dearvvašvuođa- ja fuollasuorggi riidočoavdinlávdegotti cealkámušain.

Foto: Finnmarkssykehuset

Son dadjá ahte dán áššis lea oahppun dat ahte sin dialoga ovttasbargoguimmiiguin lea dehálaš. Muhto son lohká ahte boahtteáiggis deattuhit eanet dan ahte leat eambbo fátmmasteaddji ovttasbargoguoibmi ja árabut dieđihit bargoproseassaid birra.