Njukčamánu 20. beaivve dán jagi mearridii Finnmárkku buohcciviessu heaittihit psyhkalaš dearvvašvuođasuddjema jándorovttadaga Leavnnjas.
Porsáŋggu gielda oaivvildii ahte eai lean beassan leat doarvái mielde proseassas, ovdal dát mearrádus dahkkui ja váidalii ášši dearvvašvuođa- ja fuollasuorggi riidočoavdinlávdegoddái.
Lávdegoddi lea dál gávnnahan ahte Porsáŋggu gielda ii sáhte gáibidit Finnmárkku buohcciviesu čađahit ođđa proseassa.
Eai dárkkis mearrádusa
Riidočoavdinlávdegoddi oaivvilda ahte nu guhká go fálaldat lea dohkálaš, de lea dearvvašvuođadoaimmahaga duohken mearridit bálvalusa sisdoalus.
Dan dihtii oaivvilda lávdegoddi ahte eai sáhte dárkkistit mearrádusa heaittihit bálvalusa Leavnnjas 2016:s ja sirdit dan Kárášjohkii.
Finnmárkku buohcciviessu duđavaš
Mii leat duđavaččat lávdegotti mearrádusain, dadjá Finnmárkku buohcciviesu beaivválaš jođiheaddji Torbjørn Aas.
Son dadjá ahte dán áššis lea oahppun dat ahte sin dialoga ovttasbargoguimmiiguin lea dehálaš. Muhto son lohká ahte boahtteáiggis deattuhit eanet dan ahte leat eambbo fátmmasteaddji ovttasbargoguoibmi ja árabut dieđihit bargoproseassaid birra.