Eai oaččo báhčit goaskimiid
Stáhtahálddašeaddji hilggui Skuohtanjárgga siidda ohcama oažžut báhčit ovtta gonagasgoaskima ja guokte mearragoaskima Liidnebeahcanvári guovllus, Kárášjoga gielddas. Sivva lea go eai sáhte identifiseret goaskima sivalažžan boazojápmimii.
Dan čállá Ságat.
Skuohtanjárgga siida lea dieđihan mearkkašahtti vahágiid ealus. Sis lea duođaštus guhtta jápmán misiide, ja máŋga miesit main leamaš dakkár vahágat ahte leat ferten heakkahuhttit.
Ohcamis čállet ahte guovllus leat 12 mearragoaskima ja guokte gonagasgoaskima mat jámma vahágahttet misiid. Lea maiddái biddjojuvvon mielddusin video mas oaidná ahte mearragoaskin borada ealli miesi.
Ohcan sáddejuvvui álggos Birasdirektoráhtii miessemánus, ja sáddejuvvui stáhtahálddašeaddjái loahpalaš meannudeapmái.
Stáhtahálddašeaddji čujuha vástádusastis hástalusaide identifiseret goaskimii main lea ovddasvástádus vahágiin, ja danin leat hilgon ohcama.
Sii oaivvildit ahte lea váttis earuhit gullevaš goaskimiid eará goaskimiin dán guovllus. Čujuhuvvo dasa ahte ovddeš vásáhusat vahátbáhčimiin leat čájehan ahte lea hástaleaddji sihke identifiseret ja goddit rievttes goaskimiid.
