Olgešbellodaga áirras, Kåre Breivik, mielas lea áibbas duođalaš jus fal lea juohkán boasttu dieđuid.
Gielddastivrras šattai ge duorastaga nággu das ahte gielistii go ráđđeolmmái stivrra geassemánu čoahkkimis, go lei sáhka giellaruđaid geavaheami dárkkisteamis.
Guldal:
Spiehkastii duohtavuođas
Breivik oaivvilda Aslaksen gielistii go ii lohkan ožžon revišuvdnarápporta máid Finnmárkku gielddarevišuvdna lei sutnje sádden, vaikko lei ožžon šleađgapoasta revišuvnnas.
– Mieđihan ahte gielistin poasta birra, vaikko ledjen ožžon dan, lohka ráđđeolmmái Aslaksen. Son oaivvilda ahte dien poasta dokumeanttaid ii sáhte gohčodit rápportan.
Aslaksen ii lohkan dien áigodagas vel makkárge rápporttaid gárvvistuvvon, dušše evttohus.
Lávdegoddi ii leat duhtavaš
Dát vástádus ii duhtadan dárkkistanlávdegotti. Jođiheaddji Alf Steinar Børresen lohka áigut gohččut lávdegotti čoahkkái farggámusat, vai besset digaštallát ráđđeolbmá luohttevašvuođa.
– In leat gielistan oktiige ieš dan rápporta birra, čuoččuha Jørn Aslaksen.
Breivik lohka ráđđeolmmái dat ieš seaguha sániid, ja muittuha ahte Aslaksen lea ovdal leamašan revisora ja galggášii máhttit geavahit rievttes sániid ruhtaáššiin.
