NRK Meny
Normal

Eai loga šat sámegielgirjjiid

Sámi girječálli lea fuomášan ahte sámi girjjálašvuohta ii šat geasut. Dan duođašta maid Deanu girjerádjosa jođiheaddji Ragnhild Måsø.

Ragnhild Måsø

Ragnhild Måsø

Foto: Anne Olli

Rauni Magga Lukkari har skrevet "En lykkens mann".
Foto: Dan Robert Larsen / NRK

Sámi girječálli Rauni Magga Lukkari lea vuohttán ahte sámit eai šat loga girjjiid maid sii, ovddes girječállit, leat čállán. Lukkari navdá nuorat eai beroš sin dološ bákčasiin. Danne sin čállosat eai geasut dálá nuoraid. Nuorat varra dáhttot dán áigge dáhpáhusain lohkat.

Girjerádjosis vuhttet ahte eai loga sámi girjjálašvuođas

Deanu girjerádjosa jođiheaddji Ragnhild Måsø muitala iežas vuohttit bures ahte olbmot eai luoikkat sámi čáppagirjjálašvuođa girjjiid. Eai nuoratge luoikkat dáid, sii geat leat oahppan skuvllas sámegiela.

Son čájeha dihtoris man galle sámegielgirjji sii leat luoikan olbmuide. Ja dat eai gal lean nu galle. Ragnhild Måsø muitala nuorat jerret gal románaid sámegillii, muhto go son čájeha girjjiid, de dattege eai luoikkat daid.

Olles olbmot baicce luoikkahit álkkes mánáidgirjjiid. Dan dahket danne go ieža leat oahpahallamin sámegiela.

Sámi nuorra lohká dáro- ja eaŋgalasgielat girjjjiid

Soffá Solbakk Anti

Soffá Solbakk Anti

Foto: Anne Olli

Soffá Solbakk Anti muitala iežas lohkat dáro- ja eaŋgalas girjjiid. Son lohká máinnaslagan girjjid, girjjiid maid gohčoda "fantasi" girjin. Iežas lohká lohkat girjjiid mat geasuhit. Son áinnas lohká eaŋgalasgillii, vai oahpašii eaŋgalasgiela buorebut. Sámegiel girjjjiid son ii gal nu viššalit loga, eai dat geasut. Ruovttus leat sis olu čáppagirjjálašvuođa girjjit sámegillii, muhto daid son gal ii leat vel lohkan.

Iežas lohká Soffá lohkat olu. Iđđedis lohká girjjiid go skuvllabussen mátkošta, ja eahkedis maid lohká ovdal go nohkká. Ja son lea viššal luoikkahit girjjiid Deanu girjerádjosis.