NRK Meny
Normal

Liet-Lávlut ii lágiduvvo dán jagi

Johan Kitti bissu olles guokte jagi Eurohpá unnitgielaid lávlongilvvuid  "Liet-Lávlut" vuoitin. Dán jagi oainnat eai lágiduvvo gilvvut.

Johan Kitti
Foto: Riddu Riđđu preassagovva

Eurohpá unnitgielaid lávlongilvu "Liet-Lávlut" ii lágiduvvo dán jagi. - Gilvvuide ii leat leamaš vejolaš gávdnat lágideaddji. Nu čilge Birger Winsa, gii lei koordináhtor diimmá "Liet-Lávlut"-gilvvuin Luvlieluspies.

Sápmi njelljii vuoitán

"Luđiin muitalan" lávlluiga Johan Kitti & Ellen Sara Bæhr "Liet-Lávlut"-loahppagilvvuin Luvlieluspies diibmá. Dáinna soai vuittiigage gilvvuid ja buvttiiga Sápmái vuoittu njealját geardde. Danne dán jagi livččii fas Sámi vuorru lágidit Eurohpá unnitgielaid lávlongilvvuid. Nu almmatge ii šatta. - Váldosivva dasa lea, ahte sii eai leat lihkostuvvan gávdnat heivvolaš searvvi mas livččii várri dahje gelbbolašvuohta lágidit Liet-Lávlut. Nu čilge diimmá Liet-Lávlut koordináhtor Birger Winsa Luvlieluspies.

Doalut gaskkalduvvan

Oksitania nuortamátta Frankriikkas áiggui álggus váldit badjelasat dán jagi doaluid, muhto de sii geassádedje. Dasto fállojuvvojedje gilvvut Skottlándii, muhto sii lohke fáláldaga ožžon menddo maŋŋit. Danne sii eai sáhttán lágidit dáid doaluid, čilge Winsa. Danne orrot dát doalut dán vuoro dađibahábut šaddamin lágiduvvot juohke nuppi jagi, čilge son.

Winsa árvvoštallá Liet-Lávlut lágideami máksit árvvu mielde 100.000 euro. Jus geahččalivččii duođaid seastit, de sáhtášii lágidit gilvvuid maiddái beali dán ruhtasumi ovddas. - Danne gáibiduvvo olu sihke bargu, beroštupmi ja dáhttu čađahit dáid doaluid, deattuha Winsa.

Vahát, muhto ii heahti

Winsa mielas lea vahát go Eurohpá unnitgielaid lávlongilvvut ná gártet gaskkalduhttot jagiin, muhto dát ii leat liikká hirbmat váralaš. Son navdá olu lágideaddjiid hálidit doallat Liet-Lávlut boahttevuođas, go gilvvut vuos leat sajáiduvvan. 

Jagi 2008 Liet-Lávlut doalut lágiduvvojit Friiseatnamis Hollánddas. Winsa lohká iežas hálidit jagi 2009 doaluid fas Ruttii.

  BRIGER WINSA INTERVJU