Eai buohkat leat jierásmuvvan vaikko lea eksámenáigi

Máŋgga nuorra olbmos lea dál hohppomus áigi jagis. Sihke joatkkaskuvlaoahppit ja studeantat ráhkkanit loahppageahččaleapmái.

Ráhkkanahttá ohppiidis eksámenii

RÁHKKANEAME: Dá lea sámegieloahpaheaddji May Kristine Vars ráhkkanahttimin iežas ohppiid loahppageahččaleapmái.

Foto: Maien Gaup Sandberg / NRK

Eksámenis lea ollu dadjamuš boahtteáigái, ja oahpaheaddjit fertejit ráhkkanahttit ohppiid dan stuora loahppageahččaleapmi.

Oahpaheaddji May Kristine Vars

MOVTTEGIS OAHPAHEADDJI: May Kristine Vars gal ii bala go iežas oahppit váldet eksámena go sii leat nu čeahpit.

Foto: Maien Gaup Sandberg / NRK

Sámegieloahpaheaddji Kongsbakken joatkkaskuvllas Romssas, May Kristine Vars, muitala ahte sii ráhkkanit eksámenii olles jagi, muhto ahte sis lea liige ráhkkaneapmi go lahkonišgoahtá.

– Dál mii leat ovdamearkka dihte geahččan ollesbeaivegeahččaleami mii lei miessemánu álggus, makkár meattáhusat ledje ja nu ain. Ja de mun das vieččan inspirašuvnna.

Vars muitala ahte oahppit maid ožžot eksámenbagadusa gos čuožžu movt galgá nagodit buori árvosáni háhkat.

Ráhkkanit olles jagi

Vaikko eksámenáiggi lea álki jierásmuvvat de Vars muitala ahte su oahppit eai leat balus, ja dadjá maid ahte son ii ieš ge bala.

– Mun jáhkán dat manná bures daiguin, dat leat čeahpes oahppit.

Sámegiella Kongsbakken joatkkaskuvllas

NUORRAVUOHTA: Dá leat hildut gos Kongsbakken joatkkaskuvllas gávnnat sámegielgirjjiid. Girjerádjosis leat maid dievva davvisámegiel sánit seinniin.

Foto: Maien Gaup Sandberg / NRK

Son muitala maid ahte lea veahá eará ráhkkanit vuosttašgielat ohppiiguin go nubbingielagiiguin.

– Vuosttašgielagiiguin geahčan eambbo sisdoalu, varra nu movt dárogieleksámenin dahket. Nubbingielagiin lea eanet diet grammatihkka mii lea dehálaš geahččat.

Čájehit maid lea oahppan

Deanunieida Katja Ravdna Broch Pedersen vázzá goalmmát jagi musihkka, dánsa ja drámá linjá Kongsbakken joatkkaskuvllas.

Sus lea juo leamaš sámegieleksámen ja lea dál ráhkkaneame eará, veahá earenoamáš eksámenii.

– Mus lea maŋimuš eksámen – praktihkalaš neaktineksámen gos mii oažžut 48 diimmu ráhkadit ovtta bihttá ja de čájehit dan sensorii.

Katja Ravdna Broch Pedersen

NEAVTTÁR: Nuorra nieida, Katja Ravdna Broch Pedersen, lea jo dál fuobmán ahte son áigu neaktit.

Foto: Maien Gaup Sandberg / NRK

Son dadjá ahte lea stuorra erohus sámegieleksámenii ja dán eksámenii ráhkkanit.

– Sámegieleksámenii mun válden mielde girjji ja čállen. Dát han lea praktihkalaš fága ja mun ferten čájehit ahte mun lean oahppan juoidá golbma jagis, barggadettiin teáhteriin, mun in sáhte dušše gávdnat juoidá girjjis.

Ovttasbargu

Katja muitala ahte olles joavkkus lea seammá eksámenbihttá ja ahte sii čájehit dán ovttas. Dat mii de gáibiduvvo lea ahte olmmoš lea čeahppi ovttasbargat.

– Teáhter lea duššo ovttasbargu.

Son dadjá ahte makkár árvosáni son oažžu ii leat nu dehálaš sutnje.

– Mus lea álo mihttu ahte mun galggan leat duhtavaš iežan bargguin, nu ahte mun in láve nu beroštit árvosánis nu guhka go mun dieđan mun lean bargan nu bures go sáhtán.