Mátki bistán juo 8 beaivvi – Eai beasa ruoktot go girdit eai girdde

Sii beahtahalle go čiekče dássálaga 1-1, ja vuoittáhalle go SAS girdipilohtat leat mannan bargoheaitagii, ja nu eai beasa davás.

– Mis álggii mátki ikte Osloi, muhto mii eat beassan earágo Dublinii. Dál leat mii Berlinas vuordimen beassat Osloi, muitala Geir Michael Boine.

Go ollejit Osloi, de eai dieđe mii doppe dáhpáhuvvá šat. Sin mátkefitnodat dieđihii sidjiide ahte sii eai beasa girdi mielde ovdalgo duorastaga dahje bearjadaga.

– Mus lea bargu bearjadaga ja mun balan iežamet fertet láigobiillain davás vuodjit. Dat manná jođáneappot go vuordit 2-3 beaivvi Oslos beassat girdi mielde.

Boine muitala ahte sii leat viđas mátkkis, ja okta lea Oslos sin vuordimin. Son lea badjel vahku leamašan mátkkis, ja dál gal lea son dolkan.

Ja son gii lea Oslos vuordimen lea Johan Henrik Gaup, son muitala ahte son lea ferten mátkkoštit Duiskii, namalassii Düsseldorfii. Doppe beasai son viidáseappot Stockholbmii, gos son de fertii njuiket toga mielde Osloi.

– Mun lean olu vuordán ja lean ožžon dieđu ahte in beasa ruoktot goit SAS girdi mielde, ja SAS ávžžuhii mu mannat toga mielde gitta Áhkkánjárgii, muhto dat ii orron gal nu beare miellagiddevaš togain johttit.

Go vuolgá Englándii geahččat spábbačiekčama, de ii ádján mátkkoštit dohko earágo beaivvi.

– Muhto dát ruovttumátki gal lea lossat, leat leamašan lossa beaivvit, go lean juo mátkkoštan guokte beaivvi, in ge leat vel ollen ruoktot, dadjá Gaup.

SAS bivdá olbmuid čuovvut sin neahttasiidduid vai ožžot dieđuid girdimátkkiid birra.

Bargoheaitta bistán fargga vihtta beaivvi

SAS fitnodaga pilohtat leat streiken fargga vihtta beaivvi. Badjel 1400 pilohta Norggas, Ruoŧas ja Dánmárkkus leat bargoheaitagis.

Bearjadaga boatkanii Norsk Flygerforbund ja Parat fágaservviid ja NHO Luftfart gaskasaš šiehtadallan.

Maŋŋel go botkejedje šiehtadallamiid, de eai leat šat dađi eanet gulahallan.

Fitnodat manaha máŋga miljovnna ruvnno juohke beaivvi, nu guhká go bargoheaitta bistá. Børsaárvu lea njiedjan das rájes go pilohtat manne bargoheaitagii.

SAS-hoavda Rickard Gustafson dajai ikte eahkes NRK:i ahte son lea bivdán iežaset šiehtadalliid ain bargat viidáseappot gávdnan dihte čovdosa mainna goappašat bealit leaba duhtavačča.

– Bargoheaitta lea juo bistán beare guhká, ja dás lea maiddái sáhka stuora ekonomalaš vahágis. Muhto vearrámus lea ahte mii čuohcat kundariid luohttevašvuhtii.