Eahpečielga jođiheapmi

Ain lea eahpečielggas goabbá oažžu Finnmárkoopdodaga, FeFo, ođđa stivrajođiheaddji áirasa, Sámediggi vái Finnmárkku fylkkagielda. Duorastaga leat válggat.

Finnmarkseiendommen
Foto: Eilif Aslaksen / NRK

– Mu mielas lea dehálaš ahte FeFo jođiheapmi lea stáđis, lohká stivraláhttu Nils Johan Gaup.

Nils Johan Gaup

FeFo stivraláhttu Nils Johan Gaup

Foto: Elvi Rosita Norvang / NRK

Jus čuvvot seamma meannudanvuogi nu mo ovdal, de livčče Sámedikki vuorru oažžut jođiheaddji dán jagi. Sámedikkis leamaš jođiheaddji bárralohkojagiin dan rájes go FeFo vuođđuduvai.

GULDAL: GII ŠADDÁ FEFO OÐÐA STIVRAJOÐIHEADDJIN

Soaitá spiehkastit

Nils Johan Gaup, gean Sámediggi válljii boazodolliid áirrasin Finnmárkoopmodaga ođđa stivrii čakčat, árvvoštallá spiehkastit eret dien vierus.

– Mii berret guođđit gilvvu, ii galgga leat nu dehálaš goabbá oažžu stivrajođiheaddji saji, lohká Gaup.

Dál jođiha Harald Larsen Finnmárkoopmodaga, son lohká Sámi Radioi ahte joatká dán doaimmas jus stivra eanetlohku háliida dan.