Noerh sïjhtieh båetije biejjide dïjpedh

Gellie aejkieh maahta ussjedidh mejtie barre båeries almetjh mah nænnoestieh jïh digkiedieh. Mohte daelie jienebh noerh aaj meatan.

Janni Klemensson Jannok

VIHKELES LÏEREDH: Janni Klemensson Jannok tuhtjie vihkeles meatan årrodh jïh lïeredh guktie SSR dåemede.

Foto: Felicia Löfgren / NRK

Dan våhkoen SSRen, Sveerjen Saemiej Rijhkesibrien jaepietjåangkoe Jiellevaeresne orreme, jïh desnie noere åarjelsaemien nïejte Janni Klemensson Jannok (20), Jovnevaereste meatan.

Vihkeles meatan årrodh

Klemensson Jannok tuhtjie vihkeles meatan årrodh ihke maehtedh båetije biejjide dïjpedh. Jïh joekoen vihkeles lea ahte noerh leah meatan.

Dïhte hov lea mijjien båetije aejkien bijre

Janni Klemensson Jannok

Klemensson Jannok soptsetste dïhte sæjhta gyhtjelassigujmie bovtsi bijre barkedh, båatsoeburrieh viehkiehtidh jïh båatsoejielemem dïjpedh jïh evtiedidh.

SSR Gällivare

NOERH DIGKIEDIEH: G.b Ante Baer, Katarina Daerga jïh Janni Klemensson Jannok, naakene dejstie noerijste mah lin tjåangkosne.

Foto: Felicia Löfgren / NRK

Luste vuejnedh guktie dåemede

Dan jaepien aamhtese tjåangkosne lij båatsoejielemen evtiedimmie jïh båetije biejjieh, jïh noere åarjelsaemien nïejtem tuhtjie gïeltegs jïh luste orreme.

Forsamlingen

GOLTELIEH: Almetjh goltelieh gosse SSRen åvtehke Jörgen Jonsson soptsetste.

Foto: Felicia Löfgren / NRK

– Lustemes lea gaajhkh dah saemieh råekedh jïh govledh guktie lea jeatjah sijjine Saepmesne, jïh lïeredh ånnetji guktie dah barkieh, dïhte soptsetste.


Saemieh dovne Såevmesne jïh Nøørjesne aaj tjåangkosne jïh soptsestin guktie lea sijjien dajvine.

Håhkoe åtna

Gosse gïhtjem magkeres åssjalomh Klemensson Jannok båetije biejjij bijre åtna, dle mojjehte jïh soptseste håhkoe åtna.

Manne gujhth vïenhtem hijven sjædta!

Janni Klemensson Jannok

Dïhte aaj jeahta daelie dan soe gellie mah dagkeres gyhtjelassigujmie barkeminie, jïh dan åvteste duasta håhkesjidh jïh jaehkedh tjoevkes båetije biejjieh sjædta.