Lei illubeaivi go Anne Marie Vars vulggii eatnis fárrui, Láhpoluobbala girkui.
– Lea somá go eadni lea moriidan, muhto dan rájes ii leat eadni šat juoigan, muitala Anne Marie.
Váillaha eatni juoigama
Anne Marie muitá ahte eadni lea álo juoigan, ahte luohti gullui bargguid siste, ja erenoamážit go biillain ledje jođus.
Iežas luođi ii gula eatni luhtte šat
Foto: Marit Sofie Holmestrand / NRK– Munnje lea veahá moraš, go eatni jiena in beasa gullat luođi bokte.
Lea jahki vássán dan rájes go Anne Marie vulggii eatni fárrui girkui, eadni Karen Maret lei vuolgán girkui rihpaide ja moriideami dihte.
– Eadni lei guhká hupman moriideami birra, muitala Anne Marie.
Girkostallan addá ráfi
Karen Maret Logje lei jo guhkit áiggi jurddahan rihpaide vuolgit. Sutnje ii heiven vuolgit, ovdal go lei rievttes áigi.
– Mu mielas orui boastut mannat rihpaide, bahkket dohko go in lean gearggus oskut ja jáhkkit, čilge Káren Máret.
Káren Máret Logje ii dovdda šat lossavuođa eallimis.
Foto: Marit Sofie Holmestrand / NRKOvtta láhkai doalai Karen Maret čiegusin ahte háliidii mannat rihpaide, muhto lei iežas isidiin humadan, movt dat livččii jus álgiba rihpaide mannat. Eaba lean goassege mannan rihpaide fárrolaga.
– Isit dajai «jus don manat rihpaide, de vuolggán mun fárrui», muittaša Karen Maret.
Dál mannaba girkus Káren Máret isidiinnis ja mannaba rihpaide dávjá. Dat lea stuora illun sudnuide goappašagaide. Son njuorrasa go muitala mo lei.
– Lea addán hirbmat ilu munnje, mus lea ráfi ja suohtas, go ii dovdda lossavuođa goassege.
Ii leat miella huradit
Muhto luođi ii váillat Karen Maret, nu mo iežas nieida.
– Mu lean bajásšaddan jugešvuođa juoigamiin, ja mu mielas orru luohti gullame eambbo dasa, muitala Karen Maret.
Geahča go leimmet Karen Mareha guossis:
– Dieđán ahte olbmot dadjet ahte ii luohti leat suddu, muhto mus ii leat miella huradit, mun gal ovdal lávllun, čilge Karen Maret.
Anne Marie Varsas lea ipmárdus ahte eadni ii boađe su šat juoigat, muhto háliida dan buoremusa váhnemiidda.
– Lea somá go eatnis ja áhčis lea dál somá, go leaba válljen dahkan dan maid ieža leaba háliidan bargan.
– Ferten vurket muitui daid luđiid maid váillahan, loahpaha Anne Marie.
