NRK Meny
Normal

Háliidit oahppat govvet ráppiid

Boazoeaiggát árvala kurssa boraspire prošeavtta boazodolliide, movt galgá govvet bohcco maid boraspire lea goddán.

E-bjelle rein drept

Dá čájeha boazoeaiggát Ole Máhtte Siri gova go gávnnai E-bielloálddu goddon geatkái. Govas oidno náhkkebihttá ja E-biellu.

Foto: Johan Ánte Utsi / NRK

– Boazodoallit geat besset kursii galget šaddát nu čeahpit govvet ráppiid ahte govva dohkkehuvvo duođaštussan boraspire vahágiin.

Dan lohká Cohkolat orohaga boazoeaiggát Tina Hætta gii lea searvan Finnmárkku fylkkamánni boraspire prošektii.

Cohkolat orohat lea ožžon čuođi e-biellu luoikasiin Finnmárkku fylkkamánnis, mii gulahallá "Find my sheep" mátketelefovnna Áppáin, vai orohat olbmot gávdnet e-biello álddu jođánit jus boraspire goddá dan.

4 bielloálddu gottáhallan

Dássážii lea orohat gávdnán njeallje bielloálddu maid jáhkket boraspirii gottáhallan. Boazodoallit leat váldán gova ráppiin, muhto meahccebearráigeahčču Henrik Eira ii sáhtán dohkkehit govaid duođaštussan das ahte boraspire lea goddán daid.

E-bjelle

Cohkolat orohagas leat čuođi ruoná dielkku gárttas, mat čájehit álo gos E-bielloálddut leat «Find my sheep»-áppás. Jus okta rievdá ruoksadin, de ii leat áldu lihkkasan guovtti jándoris.

Foto: Johan Ánte Utsi / NRK

Govvenkursa

Muhtun ráppiid gávdnet maid dakkár báikkiin gosa ii leat fievrruiguin vejolaš vánddardit, nu ahte boazodolliide šaddá maid hástalussan viežžat ráppiid.

Danin evttoha Tina Hætta govvenkurssa boazodolliide geat leat mielde boraspireprošeavttas.

Tina Hætta

Tina Hætta lohka ahte livčče dehálaš ahte okta orohagas máhttá govvet.

Foto: Johan Ánte Utsi / NRK

– Mii eat dieđe iežage movt galgat dahkat go gávdnat ráppiid mat leat borron. Hui dávjá lea nu ahte jus geatki lea goddán de lea juo dolvon ráppi ja eat soaitte gávdnat go biellu, ja de lea váttis duođaštit, lohka Tina Hætta.

Son lohka maid ahte livčče dehálaš ahte lea okta orohagas dahje olggobeale orohaga geas lea máhttu ja diehtá makkár govaid galgá váldit ja mainna lágiin dat galgá.

– Livčče dehálaš ahte lea okta olmmoš geasa eiseválddit jáhkket, jus midjiide eai jáhke na de ferte goit gávdnot muhtun olmmoš geasa jáhkket, lohka Hætta.

Govat duođaštussan manjit áigái

Meahccebearráigeahčči Finnmárkkus Henrik Eira čilge ahte sin bargu lea govvet nu buori gova go vejolaš ráppis, go dat galgá leat duođaštussan maŋit áigái.

– Govva ii leat dušše duođaštussan munnje ja boazoeaiggádii, muhto daid govaid galgá álbmot sáhttit maŋŋel geahččat ja árvvoštallat lei go rievttes duođaštus, lohka Henrik Eira.

Eira deattuha vel ahte váikko gii galgá beassat geahččat govaid ráppiin mat leat goddon boraspirii.

Plánegoahtán kurssa

Boraspire prošeavtta jođiheaddji Saga Svavarsdottir lohká ahte sii leat juo plánegoahtán govvenkurssa boazodolliide geat leat mielde prošeavttas.

– Dat lea hui positiiva go boazodoallit ieža árvalit ja jearahit govvenkurssa, lohká Svavarsdottir.

Son muitala maid ahte su bargoolmmái Emil Halvorsrud áigu lágidit kurssa ovttas meahccebearráigeahčuin. Ja sii sávvet lágidit kurssa dán jagi.

Guldal ášši dás:

Boraspire-ášši