– Olbmot sáhttet jurddašišgoahtit earáláhkai go leat čuvvon válgagiččuid ja nu leat ovddalgihtii jienasteamis bealit maid dutkit gažadit, lohká válgadutki ja professor Bernt Aardal NTB:i.
Válggat leat čakčamánu 14. beaivve, muhto buot gielddain sáhttá ovdagihtii jienastit gitta bearjadahkii čakčamánu 11.b. rádjai.
- Loga maid:
– Váikkuha válgabohtosii
Mannan gieldda- ja filkkagieldda válggain jienastedje 22 proseantta jienasteaddjiin ovddalgihtii.
Dát lea dan mađe stuorra oassi jienasteaddjiin ahte dás eahpikeahttá sáhttet leat maid vuorddekeahtes váikkuhusat válgabohtosii, oaivvilda válgadutki.
– Válgagiččut sáhttet boktit dihto áššiid birra erenoamáš fuomášumi ja vel dagahit ahte jienasteaddjit molsot bellodaga, muhto sii geat ovddalgihtii jienastit eai beasa molsut jienastangihpu jos gáhtagohtet, lohká Aardal.
Ovdalgihtii jienasteamis leat de maid ovdamunit daidda bellodagaide mat válgagičču áigge masset doarjaga, ja bellodagat mat válgagičču áigge ovdánit ges sáhttet massit jienaid maid muđuid ledje oažžut jos nu stuorra oassi álbmogis ii livčče ovddalgihtii jienastit, čilge Aardal.
